絲絲講場：兩個大時代 鄧聲興唔同Feel

Kenny估計，個市啱啱先起「第一浸」，升浪應該陸續有嚟。皆因香港同內地股市互聯互通，單計內地居民存款總額都過100萬億人仔，內地人要投資，北水直頭係倒落嚟，而內地股市交投又勁，A股有過萬億元成交，所以Kenny用「好驚人」嚟形容呢個浪。

今個浪啱啱起 睇長線

Kenny早前由AMTD過檔君陽，接手AMTD證券及資產管理業務部總經理個位嘅連敬涵（Kingston），早幾日先話呢個月賺咗大約七位數字，夠畀首期；咁Kenny滑住呢個「好驚人」嘅浪又撈唔撈到個首期？Kenny話無咁誇張，話自己睇長遠嘅，覺得個浪啱啱起，遲吓賺多啲先考慮入市買樓，仲話依家樓價雖貴，但樓市唔會冧，有投資價值喎。

九七冧市 公司都執埋

至於Kenny嘅人生第一個大時代呢，就慘豬豬喇。當年係九七，佢啱啱入行，個市比家吓仲癲，「全民皆股」瘋炒國企紅籌，但一轉眼金融風暴就殺到，個市冧到呢，連佢做嗰間證券行正達都執埋。好彩嘅係，當時東泰證券叫佢過檔，就係咁佢一做就十年。

咁今次大時代重現，驚唔驚歷史重演，大浪一冚過嚟間公司就……Kenny話唔驚，佢話依家唔同九七，當年孖展Loan Out過晒火，好多人賺到後仲炒起埋樓市；但依家監管嚴咗，加上係實質互通內地股市，證券行出事機會微。

話時話，○七年嗰次恒指破30,000點，乜唔係第二個大時代咩？Kenny竟然話對嗰次無乜印象，因為發生得太快，純炒「直通車」概念，來得快去得快。記憶呢樣嘢，果然係好個人嘅。

余絲韻