Market Insight：汽車股繼續踩油

對比內地股市，近幾日港股成交有回落迹象。過去三日成交維持在1,800億至1,900億元之間，反映基金大戶與內地炒家高位入市的意欲回落。恒指昨早市見過28,213點，午後無以為繼，收市倒跌106點報27,827點。顯然四月十三日，大市首次破兩萬八點心理阻力後，以橫行代替向下調整，消化近期超買的局面未完結。

要留意港匯依然緊貼7.75強方兌換上限，資金沒有明顯流出迹象，資金純粹在高位換貨，昨日內銀及內險股調整，換上今浪落後的友邦（01299）同滙控（00005），以及傳出放售南商開始收標書的中銀香港（02388），撐住指數。

古勝冇點你	萬里長空	即贏兩成

港交所（00388）昨再破300元關，收市升幅收窄，升0.8%報296.8元。近期網上討論得最多的非港交所莫屬，一個月唔夠由180元起步狂升七成。但講句公道說話，四月初個市大爆升前，大市成交得800多億左右，回顧一三、一四年日均成交亦係630億及700億左右，又有邊個可預知未來，估到成交可以狂升三倍。

聯通宜等調整入貨

如果2,000億交投持續，或者北大人繼續鼓勵大媽南下搞旺個場成為常態，純睇大市成交量去炒的港交所，近期升幅就唔算好離譜。

古勝昨日話內地白酒股炒到合合，值得睇住劉央愛股銀基（00886），結果一係唔炒，一炒就升兩成二。另外，依家仙股幾近絕迹，發現隻華建（00479）剛脫離仙班多啲啲，而且市值得2.56億元，平過殼價一大截，無理由唔落鑊啫。

收市後，TCL通訊（02618）出首季業績，季度收入及盈利分別升21%及5%，至66.8億及1.84億元，盈利升幅不及收入，主要是智能手機價格戰下，期內毛利率由19.6%收窄至19.1%。睇番花旗、瑞信兩間外資行估佢一五年盈利13.3億及15.8億元，首季只達全年預測13.8%及11.6%，似乎份成績表唔多好。

聯通（00762）首季業績亦都比市場估計遜色，少賺4.1%至31.6億元人仔。回顧四月至今，股價累積升22.7%，跑贏中移（00941）的13%，如果短期趁機抖氣，在下覺得值得諗諗，始終今年鐵塔公司及智能手機補貼減少的好處，都對聯通比較有利。

唔知同A股狂牛有冇關係，茅台消費回升之外，內地車市熱度都要比年初時大行估計理想。昨日美銀美林份報告話內地批發商數據顯示，四月首十七日吉汽（00175）、廣汽本田及長安福特，按年銷售錄得209%、94%及11%增長，銷售增長的強勢似乎延續到第二季。報告提到人行減息降準，提供大量流動性而刺激到車市，亦預測只要貨幣供應維持較高增長，第二季乘用車銷售好可能較該行預期的5至6%好，估計增長可去到10%，睇埋近日汽車股表現，成個行業有重估條件。

昨日汽車股統統撻着咗turbo一樣，比亞迪A股（002594.SZ）漲停，H股（01211）也升5.5%，兩款剛發布的SUV「宋」和「元」反應唔錯之外，高管預期今年電力車用充電池平均跌價兩成，有利改善電車毛利吸引到基金眼球。

下載東網Money18 App搶先機

三月底提出可以放心買，估值在歷史中位以下的東風（00489）亦升1.2%，今年長期心水長汽（02333）升5.4%，吉汽升4%。吉汽新款SUV GC9正式推售，會係下半年增長動力來源，11.8倍PE對於一隻業績反底股而言唔算貴，上周炒到4.72元，落番20日線又再發力，短期調整似已完成。

另外，港股持續暢旺，各位看官如欲掌握投資先機，請即在Android的Play Store或者iOS的App Store下載東網Money18 App，隨時睇到心水股票免費報價、A股報價及AH差價等，同時亦有專家即市推介，助你縱橫股壇。

古勝