市傳今年已60歲嘅建行（00939）行長張建國，可能會退下火線，但就未有退任具體時間表。
咁邊位會接任？聽講國開行行長鄭之傑同外匯局副局長李超，都係大熱。
聽到張建國或會退休，絲絲不禁有啲惋惜。想起當年，建行前董事長郭樹清同埋張建國，一齊帶領建行成為第一間嚟香港上市嘅大型內銀，一年盈利都係500億人民幣左右，依家已經突破2,000億人民幣，佢哋可以講係建行精神領袖。
絲絲更加唔捨得嘅係，佢哋好樂意答傳媒問題，有時仲答到無人再發問為止，內銀管理層嚟講相當罕見。希望佢兩位嘅「改革者」精神可以延續落去。
余絲韻