下個禮拜一（20日）和黃（00013）舉行連串股東大會，有「新股女王」之稱嘅中央證券登記董事總經理鍾絳虹，下周一都要去一轉紅磡海逸君綽酒店，睇住和黃開會同數票嘅流程，不容有失。
講開今次世紀重組，鍾絳虹話發現個有趣現象，就係近排股市狂升，但卻有80宗和黃小股東由證券行提倉轉為實物持有股票嘅個案，相反，將和黃實物股票存倉到證券行以備沽出嘅個案，就只有20宗。佢笑話，可能係超人班Die-hard粉絲想要番張和黃實物股票，等和黃正式除牌後，股票就變成絕版珍藏。依家揸和黃實物股票嘅股東人數，有成一萬人左右。
余絲韻