萬達王子閃賺三千萬
到底識投胎緊要啲？定係識投資緊要啲？內地超級富豪大連萬達老闆王健林位公子王思聰，最近畀大家知佢唔只識投胎，仲識投資。事關王公子自己間公司之前認購咗深交所上市公司棕櫚園林嘅一批非公開發行股權，呢排A股牛成咁，棕櫚園林股價已較年初升咗三成，即是王公子坐定定又賺咗3千幾萬人仔。
有份買棕櫚園林配股
不過，王公子今次賺錢，其實又可能關佢位王阿爸事。有內地投行人士分析，棕櫚園林非公開發行對象就得9個，個個都來頭唔細，而且發行價又相當低，當撞正升市，賺起嚟唔講得笑。加上萬達有地產業務，估計可能同棕櫚園林有過合作項目喎。See，咁So嘅嘢，你估真係人人有份。
其實對王公子嚟講，數百萬係碎銀，幾千萬只係散紙。絲絲聽講佢一講起要買翡翠畀王阿媽，就話「兩個億也還好吧」。至於女朋友生日，「生日禮物也不貴的，十幾萬吧。不過參加了一個慈善拍賣，買了達明赫斯特的米奇（著名藝術家Damien Hirst嘅畫作），一千五百多萬，當情人節禮物送她了。」嗱，以上絲絲聽講o架咋。
出手豪 獲封「國民老公」
王公子唔單只對囡囡豪爽，舊年二月當佢微博粉絲突破一百萬，王公子就同粉絲玩抽獎，頭獎係雙人頭等艙加5星級酒店長白山三日遊，仲送MacBook Pro同iPhone。難怪班粉絲咁鍾意佢，無論男女都叫佢「老公」，叫叫吓王公子就做咗「國民老公」。
但係榮升「國民老爺」嘅王阿爸，似乎唔太Like呢個身份。上個月王健林接受訪問時，一聽到個仔畀人叫做「國民老公」，眉都皺晒，仲講到明「不可能有國民老公，只有一個人的老公才可以」。
到底識投胎定識投資緊要啲，你嘅結論係......
余絲韻