絲絲講場：打工仔劈炮理由：回家炒股

老闆：蟹咗記得返嚟

呢幾日網上瘋傳Cap圖，係份辭職申請表，表上劈炮埋由只有一個，就係「回家炒股」！絲絲終於明白，呢啲先叫做霸氣。

份表仲有埋上級意見。主管審批話「股市有風險，入市需謹慎」，人事部仲話「被套了再回來」，意思即係「蟹咗再返嚟」，認真窩心。

呢啲Cap圖，網上仲有好幾個版本，有啲版本入面嘅打工仔係做「財務部出納」，亦有做「車間」，連做「運營中心」嘅都有。「對公司希望」嗰欄，有啲填「沒希望，工資太低」，有啲填「公司愈辦愈好，早日IPO」。

內地炒股大軍愈來愈人強馬壯，有樓嘅再按，有信用卡就透支，甚至有學生哥賣咗部電腦，下一步會唔會有人賣血？

肖鋼：勿信寧買錯莫錯過

有網民喺微博話「不偷不搶，誰也不靠，也不看任何人的面色，輸贏都是自己的，今天一天兩萬多，除了做鴨及賣腎，還有比炒股更適合我做的工作嗎。」睇見咁，連中證監主席肖鋼都忍唔住出聲，叫大家咪相信「寧可買錯、不可錯過」。

去到呢個地步，股民冇有怕？嗱，佢就出現喇，係丁蟹，下星期一重播《大時代》就見到佢。

《小時代》對沖《大時代》

內地股民亦唔敢唔信邪，話破解丁蟹效應，要搵套《小時代》嚟做「對沖」。網民有做功課，佢哋發現每當《小時代》呢套戲上映，就係熊市結束、牛市開端之時，最啱入市。

講到《小時代》效應咁勁，套戲講乜？就係四個女仔好青春同好多愛情，講完。最新個集《小時代4》要暑假先上，睇怕要係咁Loop前三集頂住先！

余絲韻