Market Insight：中廣核電升勢未盡

阿爺大鑼大鼓幫港股通撥火，講明管理萬七億元人仔的公募基金，可以繞過QDII配額入市。睇番除咗消息公布的頭兩日，105億元人仔額度用盡之外，港股通的熱鬧情況好快打回原形。昨日南向剩餘額度97.9億元，用剩93%，街外唱到恒話五、六月深港通開車的同時，北向南向限額都會齊齊加碼，真係唔識畀佢嚇死，識就笑鬼死嗰隻。

話雖如此，整體大市成交的確又比二、三月多一大截，過去七日平均2,398億元，錢從何來，唔通真係經羅湖的人肉解款員可以帶到咁多人仔過關咩。

古勝冇點你	萬里長空	累升四成三

古勝有個認識超過20年的芬佬朋友，對後市睇法同在下不約而同，都係相信大市抖一抖後，爆升之日是指日可待。點解升？從舊年開始，中國經已擺出托市穩經濟的姿態，呢點唔使多講，今年香港政改年要股票定要選票，看官們自己諗諗。

不過，隨着港股愈來愈走向情緒主導的A股化進程，甚麼市盈率、市銷率、EV/EBIDTA等的基本比較數據，都已經變得唔重要。睇吓阿里健康（00241）用近200億元收購一間賺唔夠1億人仔的網店，可以炒得幾癲就知一二。

放棄價值追逐國策

對於在下一類自認為價值投資者信徒，可悲係以前入市，會以其他市場參與者，尤其芬佬的角度去衡量一間公司值唔值得買入，依家變成純粹揣測或者追逐國策。

好似昨日水務及核電設備股有消息，立即炒到飛天。今時今日，再講上市公司基本因素似乎已變得不合時宜，形同恐龍等絕種一樣。

內銀股抖氣，輪到內險股接力，平保（02318）、國壽（02628）及太保（02601）升幅介乎3至5.5%，三隻股票推高國指104點，佔國指升幅四成二，但有畏高症的，在下認為內銀股仲係較正路風險較低之選。國務院印發《水污染防治行動計劃》，內容提到二○二○年，全國水環境質量改善目標，香港人成日睇住年年加價的東江水污糟到爆燈的新聞，相信身為消費者，都好希望「水十條」真係可以落實供水之質素。

受政策消息影響，水務股全線開車，中滔環保（01363）昨升13.1%、北控水務（00371）升10.3%、康達環保（06136）升10.1%、中國水務（00855）升7.7%，最細隻嗰隻中國水業（01129）得1%進帳，就連新加坡上市隻光大水務（U9E.SI）都升7.5%。

國務院審核「華龍一號」三代核電技術示範機組，核電股又再發威，上海電氣（02727）爆升20.5%，哈爾濱電氣（01133）升17.3%，中核國際（02302）升16.2%，中廣核電力（01816）都升9.2%。假如睇番一兩年內業績透明度及增長條件，哈電同上氣都唔係本人杯茶，但純睇圖又真係大成交破晒位，實在唔夠膽亂講個頂會去到邊。

對比之下，內地核電經營一哥，全國坐擁過半核機組的基金股中廣核電，估計短期走勢至少無上述兩隻咁飄，股價上周見過5.1元上市新高之後，本周二、三落番嚟搵支持，周三見4.1元，未到4元的10日線又再向上，只要破4.65元阻力，在全無蟹貨及基金吸到乾晒之下，短期應可再創新高。

下載東網Money18 App搶先機

集團去年盈利升36%至57億元人仔，收購台山核電廠41%權益開始浮現，上市後淨負債大減，融資成本減低，是今明兩年業績增長的來源。一五年25.7倍PE，係就係貴少少，業績較啱睇，半個國家隊成員的CICC最近出報告唱到5.57元，短炒一轉實在未嘗不可。

另外，港股持續暢旺，各位看官如欲掌握投資先機，請即在Android的Play Store或者iOS的App Store下載東網Money18 App，隨時睇到心水股票免費報價、A股報價及AH差價等，同時亦有專家即市推介，助你縱橫股壇。

古勝