案件未發生，就有警察出現拉人？咪以為只係《未來報告》橋段，現實中真係有人搞緊「罪案預警系統」，不過唔係警察，而係投行摩根大通。
摩通近幾年嘅法律開支同埋罰款高達360億美元，當中包括大家大概仲記得嘅嗰條「倫敦鯨」，一二年因為一位花名叫「倫敦鯨」嘅交易員炒燶信貸違約調期（CDS），摩通除咗累蝕62億美元外，仲被美國監管機構罰咗9.2億美元。
終於摩通的起心肝，搵專家寫軟件，搞咗個預警系統，專門喺未發生事之前，就先搵出啲大機會亂咁落盤嘅交易員，看實佢哋，以免整多幾條「倫敦鯨」或者甚麼「金融魔童」出嚟。
但個軟件點知你會唔會係容易亂嚟嗰隻？
原來佢哋係會記錄低你日常工作，包括公司辦嘅專業守則課程你有無走堂、有無違反交易守則、交易有無超過風險額度...再由軟件進行數據分析，嚟監察住員工有無機會行差踏錯。暫時呢個系統會先喺摩通嘅坐盤交易部門進行測試，至一六年就會推廣至全球投資銀行、資產管理等部門。
余絲韻