絲絲講場：大媽為炒股乜都制
呢幾日港股大時代，過山車到呢，有人話係港股A股化，話呢種係內地炒法。想知內地炒法係點之前，要先知道內地股民係點嘅。嗱，知己知彼，百戰百勝。
「一人廿戶」時代降臨
近排A股狂牛，內地股民如癡如醉，瞓身投入。絲絲教室嘅第一課，係教大家學習「瞓身」呢兩個字，為咗炒股，磨喺股票行寸步不離，你可以去到幾盡？內地股民朝早買完餸就去股票行打躉，香港旺市時都係咁，冇乜特別。喺入面食埋飯，都好正常。織冷衫呢？都唔出奇嘅。湊仔？Well...咁對住部股票機染埋髮呢？嗱，記住，做任何事，投入係最重要嘅。
內地前日剛開放「一人一戶」限制，即是內地股民以後每人可以開唔只一個股票買賣戶口，最盡去到一人可開二十個股票戶口。
絲絲啲內地Friend冧（或坤）愛人時好興講嗰句「親愛的，我帶上你，你帶上錢，咱們去乜乜乜」，佢哋呢兩日改做「親愛的，咱們去開戶吧，我帶上你，你帶上錢。然後，咱們廣發開一個、招商開一個、國信開一個、中信開一個，咱們一定要開遍所有證券公司，親愛的你一定要帶上錢啊。」幾溫馨。
中登系統爆到癱瘓
「一人多戶」開閘有幾墟冚？絲絲聽講，首日齋一間券商就新增咗10萬客。到尋日，中登（中國證券登記結算）個網上系統喺上晝十點幾，已經逼爆到...癱咗。
今後「一人廿戶」都得，內地股民唔使去梗一間股票行。唔知啲股票行有乜強化貼身設施去留客？為咗留住啲客，又可以去到幾盡呢可。
余絲韻