絲絲講場：富豪交友網最Buy素顏
外國交友網站MillionaireMatch.com打正百萬富翁旗號，釣金龜淘古井一網打盡，想入會除咗要有錢有樣，最好仲唔化妝。
最近外國興素顏（嗱，唔係韓風嗰隻），個個女星都喺網上晒素顏Selfie，無論係Taylor Swift、Heidi Klum、祖娜芭莉摩亞，甚至連Beyonce都爭住Post啲無化妝相上網。連呢個自稱係「百萬富翁俱樂部」嘅交友網站，都鼓勵啲女會員交出素顏自拍相，仲會喺佢哋個Profile揼個「素顏徽章」做賣點。
有圖未必有真相
嗱嗱嗱，之不過呢啲標準係唔適用於男會員嘅，兼且無話唔准用美圖秀秀喎。換言之有圖都未必有真相，女神嘅纖腰長腿尖尖下巴可能係……而男神睇落似6呎2，實得5呎3都話唔埋。
仲有樣不可不知，雖然呢個網站自稱係「百萬富翁俱樂部」，又話自己全球有200萬個會員，但就唔肯講有幾多位真係百萬富翁，一味齋講會核實會員嘅財政狀況。無論釣金龜淘古井定尋真愛，小心貨不對辦。
余絲韻