有人坐監唱《友誼之光》，有人就發掘到商機。美國Frederick Hutson創辦咗間Pigeon.ly搞囚友通訊服務，打破大公司壟斷，畀囚友可以打平電話兼收發家人相片。計計吓，至少有1%美國人都有至親坐緊監，係一個值20億美元嘅市場，即係成156億港紙！海闊天空到吖！
話說Hutson廿幾歲因販賣大麻而「無自由，失自由」時，佢冇掛住「傷心痛心眼淚流」，反而喺獄中狂咪《華爾街日報》、《Inc.》同《Wired》。吓，你唔曉呢啲雜誌？好自己反省吓！
嗰四年，Hutson仲觀察到囚友對外通訊市場畀幾間大公司壟斷，打電話超貴，完全被剝削。佢回復自由身後創辦Pigeon.ly，搞網絡語音電話生意專幫囚友同屋企人聯絡，比之前平七成，Pigeon.ly仲為囚友同家屬提供埋Share相一條龍服務，結果空前成功。
想創業做老闆，又呻條件唔夠？睇吓人哋，咪再諸多藉口。
余絲韻