珠江鋼管（01938）主席陳昌馳騁商場多年，原來亦係文人雅仕，鍾意養錦鯉，又養過蜜蜂，仲鍾意盆景藝術，可謂多才多藝。咪以為陳總只係附庸風雅，佢嘅收藏絕對唔係普通貨色，好似佢養嘅錦鯉「昭和三色」就喺一二年攞到第44屆東京錦鯉大賽全場總合冠軍，及第5屆亞洲杯錦鯉大賽全場總合冠軍。
呢條昭和三色當年七歲，身價成200萬元人仔，即係相當於當時沙田第一城及嘉湖山莊一個細單位嘅價值！
日本係錦鯉之鄉，東京錦鯉大賽為世界最高等級嘅錦鯉比賽，陳總嘅愛鯉自然係極品啦！好多人都覺得養錦鯉係有錢人嘅玩意，陳總就話佢細個時就鍾意養，呢份怡情養性，睇嚟絕對唔可以用金錢去衡量。
陳昌業餘時間潛心研究錦鯉養殖技術，昭和三色一二年攞獎後由日本成田魚場運返陳總旗下嘅廣州珠江水之寶錦鯉魚場，令呢個錦鯉魚場生色不少，至今已經發展成為國際錦鯉界最具影響力的魚場之一喇。
珠江鋼管本月一日公布去年度盈轉虧，蝕近4億元人仔，絲絲諗，如果上市公司嘅業績好似陳總旗下嘅錦鯉魚場咁威就好喇。
陳總早排同傳媒傾開偈，話想將嗜好公諸同好，同珠海市政府傾喺長隆隔籬搞個展館，擺放私人收藏嘅錦鯉、盆景同埋書畫，如果第日去長隆睇完野生動物，再有機會欣賞吓陳總嘅錦鯉、盆景咁，就真係別有一番風情喇！
余絲韻