小米創辦人雷軍搞作多多，就快係一年一度嘅「米粉節」，小米趁5歲生日會發布幾樣新產品，即使絲絲完全唔係米粉，都好想知坊間傳得好行嘅小米自家移動支付會唔會面世。
尋日朝早小米懶神秘喺官方微博貼啲「暗號圖」，一班心急米粉就爭住估係乜。其中一幅圖上面有隻飛天豬仔錢罌，又有個人幣銀仔，仲有個暗號「AA」。有人估係代表智能錢罌，亦有人心邪估「愛愛」，話有可能會係出「小米Domdom」添！
坊間一直傳小米會推自家移動支付技術，有米粉喺小米手機內置嘅小米錢包App，發現「貨幣基金」服務測試版，換言之嚟緊可以用App買基金。目前測試版只有一款「易方達天天理財基金A」，年收益都有成6.437%，仲高過餘額寶！
雷軍嘅風頭，又點會畀小米搶到！佢個人微博尋日貼咗張同男神黃曉明合拍嘅電影海報。雷軍話自己第一次拍戲，拍咗幾鏡，仲得黃曉明教佢做戲。搞邊科？總之就同北京國際電影節有關喎。雷軍仲用自家小米Note影咗張Selfie，佢成身黑老西，襟前插住朵玫瑰，仲專登染咗幾條白頭髮，Chok到呢！
冇得Chok住拍戲，但想做電影主角？一樣得。近排有個App「足記」喺內地爆紅，人人王家衛上身，事關個App幫你將啲生活相「搞」到變有埋字幕嘅劇照，普通食飯飲水都忽然好「花樣年華」，啱晒啲自認文青。
紅起上嚟，啲錢就會識排隊送上門，足記創辦人話已經有二、三十個投資者搵上門，仲話呢兩星期內會完成A輪融資，又傳新一輪融資起跑價係千萬美元級別喎。咪仲勁過拍戲！真的嗎？
余絲韻