期指觀瀾：小注高沽博見24670
港股通通車以來靜蠅蠅，阿爺終於忍唔住出手，畀無QDII配額的內地基金掃貨，實行北水南調，到底有幾多會真金白銀入市，大家得個估字。不過，消息就畀機會好友在三月期指結算日去到盡，港股昨升368點收24,855點。
昨日四月期指開24,700點，比上周五日市高開122點，以上周五的消息去衡量，期指開得唔高，之後中資、國企以慢火煎魚方式炒上，畀空間好友逐少推進，四月期指午後見24,990點之後，結算價塵埃落定，買盤先至放軟手腳，臨尾市見唔少即市食胡盤，四月期指日市收24,857點。
以24,700點升至24,990點，共290點，調整返回24,831點，即159點，等於即市途程的54%，雖然昨日大市主板成交1,408億元，但以期指回調幅度，又並非強到不能的一類，好友仍怯於美股走勢一般，而且周四後港股要到下周三方復市，期間要賭埋美國三月就業數據，令到大戶擺出一副有胡唔食，罪大惡極的入市態度。
心理上應抱破位追買的想法，但見昨日四月期指走勢，加上假期前僅三個交易日，現貨要硬闖24,855點有點難度，昨收市前小注在24,900點沽期指，短線目標24,670至24,730點之間。
John Mullen