「豪門爭產」就聽得多，為咗一個家族名稱而打官司，見識過未？近日被認為係人類史上最有錢嘅金融豪門羅富齊家族（Rothschild），旗下嘅兩間分支公司正準備喺法國法院上爭奪呢個響噹噹嘅家族姓氏。
事緣係法國一家財務顧問Rothschild & Cie對外宣稱自己係「羅富齊集團母公司」，搞到法國——瑞士資金嘅愛德蒙德羅富齊（Edmond de Rothschild）集團好唔Like，打算向法國法院申請禁令，佢哋認為呢個金融界豪門個名係屬於佢哋所有。
唔多識羅富齊家族？唔出奇，呢個老牌家族一向好低調，亞洲地區對佢哋確實唔多曉，但因為宋鴻兵寫嗰本《貨幣戰爭》賣到行晒，書入面嘅羅富齊家族係金融市場呼風喚雨嘅無形之手，睇到內地讀者好有興趣。
雖然佢哋家族資產總值係個謎，但有人估計介乎3,500億至1萬億美元間，若屬實就名副其實「富可敵國」。話時話，你數唔數到有幾多個零？
余絲韻