絲絲講場：A股新手讀書愈少愈勇
內地A股近排係咁升，對上一個星期新增開戶數破晒紀錄，有成113萬幾內地股民湧入市。連交銀國際首席策略師洪灝都話，A股依家周圍都係泡沫。咁喺到浸緊泡泡浴嘅係啲乜人？西南財經大學一個調查話，齊齊炒起A股嘅股民生力軍，大部分學歷高中未到。
三分二「股民」讀到中學
呢個調查舊年開始做，訪問咗大約4,000個內地家庭。調查發現，股民新手當中，有三分之二多啲嘅最高讀到中學，有三成多啲嘅未到12歲就已退學。炒股叻唔叻，同學歷有無必然關係？絲絲就睇唔到有關係喇。
洪灝最近份報告《Price-to-Whatever Ratio：A Bubble Scenario》話滬綜指可升至4,000點附近。
咦，Price-to-Earnings Ratio（市盈率）同Price-to-Book Ratio（市帳率）絲絲就聽過啫，Price-to-Whatever Ratio？市乜率？
有市夢率 亦有市傻率
話說洪灝認為，睇今時內地股市，傳統估值方式未必用得着，佢又話有日內地飯局摸住酒杯底歎50年國宴級白酒時，主人家問佢點評估內地股市市值，佢答「用市盈率或市淨率，但兩個比率都已經好高」，主人家笑話「不如用『市夢率』、『市膽率』、甚至『市傻率』吖！」飲到High High哋要轉飲茶嘅洪灝，索性舉茶話「就為市乜率飲杯」！
洪灝仲喺份報告結尾，用咗英國經濟學家凱因斯嗰句「無嘢災難得過，喺一個無理性嘅世界作理性投資」。咁洪灝嘅投資建議即係？竟然係「買買買」！
余絲韻