絲絲講場：Google見工 即場出賣靈魂
Google向來公認係最多人想入嘅公司之一，人工高福利好，不過想入一啲都唔容易，尤其係Google創辦人布林（Sergey Brin）仲會親自in人嘅年代，事關佢出咗名鍾意刁難求職者，成日問埋啲古靈精怪問題，例如「如果要洗晒全西雅圖所有窗，應該收幾錢？」，不過，最經典嘅，都算係叫人即場整份出賣靈魂嘅合約。
幫布林起草魔鬼合約
話說，Google成立初期，所有應徵者都必須經至少一位創辦人嘅面試考驗，即係布林或佩奇（Larry Page）是但一位。就喺○二年，呢位哈佛畢業生Alissa Lee應徵做法律團隊時，好有幸撞正布林做考官。布林只係叫Lee即場draft份合約，限時30分鐘，呢啲都係律師做慣做熟嘢啫……但，咪住，布林跟口話「合約係畀我向魔鬼出賣靈魂用嘅」。
Alissa立即呆咗，連布林想喺魔鬼度換返啲乜都唔記得問，就要即刻開筆寫。
結果？結果Alissa喺Google做到○九年，足足七年添。
余絲韻