絲絲講場:湯文亮呻無辜被追數

對於日前有人上門追數,紀惠集團行政總裁湯文亮話,早年同朋友喺內地夾份投資開廠,其實已經退出,點知舊年六月個朋友走咗佬,由於曾經喺銀行簽擔保,即盡責任喺兩個星期幫佢還款約8,000萬元,其實早就知間廠有問題。

而呢個走佬朋友嘅親友,過往同呢間廠做物料供應,知道佢幫手還過錢,即時喺香港搵人追佢數,之前又貼街招,日前仲有兩個人上佢公司話要追數,但單據、律師信乜證據都無,連數都唔識追,所以絕對唔會畀錢,已經即時報警處理。

不惜工本保清白

湯文亮又話,其實自己已經盡晒責任,之前已經幫手請埋會計師、律師幫間公司清盤,發現呢間公司出面有2,000萬元街數,諗住幫番班債主追番,而由於成件事已交由ICAC調查,所以唔想多講。佢話自己一向行得正企得正,對方無證無據,所以一毫子都唔會畀,唔怕開埋記招,仲話如果事件令佢或者紀惠集團名譽有任何受損,會告對方誹謗,仲會不惜同對方打官司。

余絲韻