絲絲講場：港交所女董勢力倍增
尋日政府宣布委任前滙豐香港「一姐」馮婉眉同奧緯諮詢亞太區主席席伯倫做港交所（00388）董事，任期兩年，下月廿九日生效。馮婉眉將會係繼梁高美懿後，再有獅子銀行女大班加入港交所。
馮婉眉入局做「榜樣」
本月初，社商賢匯發表一份最新嘅本港女性董事年度報告，提及恒指成分股女性董事比例首次錄得雙位數，由去年嘅9.6%升至11.1%，係○九年以來最大嘅升幅。港交所作為上市公司嘅「榜樣」，今年亦帶頭加入多啲女性董事自然順理成章。講真，計絲絲話，港交所六名董事係由政府委任，即係話仲有好多空間可再加入女性董事。最好未來再加多一、兩個女董事也無妨！
至於另一名新董事席伯倫，市場就可能唔係咁認識。聞說佢領導嘅奧緯諮詢，喺行內好有地位，奧緯諮詢係一家國際管理顧問公司，聽聞港交所高層都對佢寄予厚望，希望佢可以喺風險管理同擴大上市公司來源方面，幫到港交所。
唔講唔知，絲絲聽聞席伯倫仲有另一個身份，係已故知名藝術家張大千個女婿。
余絲韻