絲絲講場：趙樓神請飲茶氹女Fans
絲絲尋日喺尖沙咀諗住去Sheraton酒店Hea吓Tea吓，點知親眼目睹一幕「趙樓神」被女粉絲捕獲事件，仲係好熱情嗰隻。若同另一位「林樓神」相比，唔知邊個女粉多啲呢可？
先講「趙樓神」，即係長實執行董事趙國雄，尋日喺同一家酒店主持新盤紅磡悅目記者會，正當記者會開緊時，一位同絲絲一樣飲緊下午茶嘅女士飛身撲出，仲同記者爭位影相。
售後服務 有求必應
醒目公關立即上前問聲呢位女士嘅來歷 ，原來係「趙樓神」粉絲。佢表明身份後，即刻走埋「趙樓神」身邊，主動索取卡片，笑問憑「片」買樓有冇折頭，兼且合拍Selfie留念。絲絲睇住「趙樓神」全程有求必應。
女粉絲仲呻話，早前買咗長實旗下荃灣環宇海灣嘅單位，但依家仲未收到收樓通知書，絲絲當時心諗，噢！全場都係記者喎。
樓神即係樓神，趙國雄立即搵公關同女粉絲抄低晒資料，仲表明會跟進協助，嗱，未完o架，「趙樓神」仲幫佢同佢嘅朋友「埋單」請飲茶，氹得呢位女粉絲呢……
絲絲即刻諗起另一位「林樓神」恒基營業（一）部總經理林達民，佢三年之前同鄺美人一見鍾情就開始咗，連美人都氹到，「林樓神」肯定都有唔少嘅女粉絲，佢同美人上個月先「再見亦是朋友」，依家回復單身。下回到恒基有新盤記者會時，分分鐘輪到「林樓神」被捕獲。
余絲韻