Market Insight：中電信隨時再開車

美國經濟表像睇落係唔錯，但唔少人都已經質疑在失業率持續改善之下，人均收入及時薪增長似有還無，就業市場的改善仲係停留重量唔重質的階段。

此外，聯儲局退市及加息的預期，經已令美國樓市近一年升勢大幅減慢。古勝早幾日睇到篇報道，依家美國約有5,000萬間房屋仲未還清按揭，唔講唔知，足足一成仲係處於負資產。負資產係乜唔使在下多講，經歷過香港九七年樓災的更係感同身受。

古勝冇點你

萬里長空

美國樓市吹淡風

唔少物業其實都只係啱啱上番水面，大約兩成物業賣樓後，業主還完畀銀行套現僅得樓價兩成，大約3%於賣樓後更只攞得番5%。負資產當然唔使諗換樓，在樓市交易成本高昂的美國，後面嗰兩類業主要換樓，都畀唔到新屋首期，事關海嘯之後，兩房收緊對按揭審批，政府也提高銀行資本充足要求，佢哋想攞到份按揭唔容易。美國樓市淡風，已經從收緊超過一年的動工數據睇到一二。

聯儲局點去處理新一步退市行動，相信看官凌晨便已經知道答案。睇近期美國十年期債息由2.26厘，級級落到去2厘左右，債商都係預期加息難免，但幅度相當有限。

炒兩會之後，有穩經濟政策出台，A股升到癲，滬綜指昨又升74點收3,577點，改寫七年高位，兩市成交又再過萬億元人仔。港股雖然維持逢二進一，不過恒指都有219點進帳，收報24,120點，主板成交似樣有962億元。世紀合併後首日掛牌的長和（00001），升0.9%收報151.5元，套戥帶動和黃（00013）升0.5%收103.9元。周初隊到兩年多新低64.35元的滙控（00005），連續兩日死貓彈，昨收65.9元升1.3%，成為指數領漲股之一，之前70元的散戶血肉長城，今日可能掉轉頭成為技術反彈的攔路虎。

吉汽買貨唔使急

傳聞中國證券業協會有針對券商代客理財的法規徵求意見文稿，二線券商股炒到出煙，信達國際（00111）最誇升28.3%，申銀萬國（00218）、第一上海（00227）等全部升幅過一成。睇隻信達舊年十二月見過2.28元之後，無晒成交乾跌到上周的1.01元，到底有幾多人真係享受到昨日升浪呢？呢類股票跟本無得跟，至多係戥人高興。

近幾個月內地經濟數據差到痺，業績期中資公司的業績亦都無乜特別標青，難怪炒家要亂石投林走去賭阿里影業（01060）。吉利汽車（00175）全年賺14.31億元人仔，按年跌46%，中期業績已見到重塑自主品牌以及俄羅斯盧布貶值的影響，預咗倒退，惟最終數字仲係稍差預期，內銷及出口倒退16.8%及49.8%。

不過，下半年EC7轎車的銷售唔錯，佔全年汽車銷量近三成九。展望今年，吉汽有新款GC9轎車以及兩款帝豪及遠景系列的SUV推出，加上去年盧布貶值的匯兌損失屬一次過，今年業績應無乜難度可以回升至25億至28億元人仔，市盈率9.1至10.2倍，與歷史平均值接近，是昨日成績表麻麻而股價唔多肯跌的主因。睇番股價由去年底盈警後低位2.4元至今累積反彈唔少，可以等等，鍾意turn around故事的可以諗吓隻長汽（02333）。

全力推動4G服務

中國電信（00728）去年成績表同樣無驚喜，賺176.8億元人仔，微升0.7%，中電信預告一五年資本開支會比去年大增四成至1,078億元人仔，近六成是應付移動業務，主要是建設遍布全國120個城市，共32萬個4G基站所需。

此一時彼一時，早前聯通（00762）派成績表，預告因應4G投資，資本開支大增，股價反而見光死。昨日中電信業績麻麻，但老總豪言今年計劃賣1億部4G終端機，估計當中6,000萬會用中電信服務，股價反而升得多過大市，抽升1.6%收4.84元，似乎攞4G牌趁消息出貨已經告一段落，未來幾個月有鐵塔公司消息及由零開始的4G上客數字支持，斷估今次應該係時候開車喇。

古勝