絲絲講場：新秀麗總統喼Sell氣派
「喼神」新秀麗（01910）之前用開韓星做代言人，但尋日記者會場，半粒韓星嘅影子都冇？原來新秀麗今期搞氣派，今年主打Sell頂級牌子Hartmann，有幾頂級？Hartmann嘅喼聽講入門閒閒哋要成萬蚊。
Hartmann用家除名門望族外，仲有多位總統。咁頂級嘅牌子想喺亞洲打響名堂，邊個夠級數代言？絲絲忽然聽到隔籬同事嘆咗句「嘩，咁又賺廿幾億！」邊位？原來係趙薇，佢舊年入股嘅阿里影業（01060）屢創新高，帶挈佢帳面賺咗廿幾億，認真投資有道。
咦！係噃，中國有邊個唔識趙薇？論身家論樣論知名度都啱晒，新秀麗會唔會諗諗佢呢？
李敏鎬取代「都教授」
不過，絲絲始終掛住「來自星星」嘅「都教授」金秀賢，新秀麗舊年請咗金秀賢代言，加埋早排成個亞洲都中晒星星毒，帶挈新秀麗一款袋賣到斷晒貨！金秀賢嘅合約舊年底完咗，新秀麗就換上另一位韓星李敏鎬代言，即係《繼承者們》男神角色「金嘆」囉。睇吓今年「金嘆效應」又點先。
余絲韻