絲絲講場：馬雲「面子」當錢使

即場「掃臉」淘寶買郵票

佢前日就喺CeBIT開幕式上，即席示範阿里旗下螞蟻金服嘅全新Smile To Pay掃臉付款技術，取代傳統用密碼作為購物後嘅支付認證，仲即場用嚟喺淘寶度淘咗個一九四八年嘅漢諾威紀念郵票。

自認長相似外星人

馬雲今次用自己個樣做示範，擺明有優勢。佢自己都講過「我很普通，只是長得像外星人」，一副不凡ET相，辨識度自然高，只係絲絲呢啲平凡嘅地球人，唔知係咪真係用到？

呢個技術係由螞蟻金服同Face++一齊開發，識別率聽講高達99.5%。呢家Face++喺二○一二年先成立，用戶除咗阿里外，仲有微博、陌陌等，Face++往年十一月仲融資咗2,200萬美元，公司估值以美元計過億。

螞蟻金服呢項指吓塊面嚟畀錢嘅技術，目前雖然仍未正式投入商用，但絲絲睇嚟好快。記唔記得上年愚人節時，支付寶喺官方微博放咗段片，介紹全新支付產品「KungFu」（空付），話用家可以Scan咗任何一樣實物，包括你隻貓、你隻戒指、你膊頭個紋身、或你自己個樣，用作授權支付。即係話，出街唔使帶銀包手機，買嘢時齋Show吓樣實物，經獨有快速識別技術畀錢，想買乜就買乜。當時，絲絲都以為只係愚人節玩嘢，點知，一年唔夠就成真。所以話，科技嘅嘢，邊話得埋。

余絲韻