星級分析員Portwood Capital主席卓百德話要自數平生最瘀嘅五單投資嚟警吓世，佢早排講咗第一單後，又自爆第二單：佢破咗自己訂下嘅「咪掂飲食業」家規，蝕光不單止，仲要畀仔女話。
話說卓百德細個親眼見住佢阿叔阿嬸經營餐廳餬口咁艱辛，再加上佢自己做金融顧問生涯入面，亦見唔少飲食行起起落落，好多開頭好勁，但半年至一年就執笠收場。所以佢早就自設家規，吩咐仔女千祈咪掂飲食業。
點知，就喺幾年前，卓百德成日幫襯開嘅酒吧連餐廳，個老闆撩佢話想搵人夾錢再開多五間分店，呢位老闆有埋計劃書有齊數字分析。而卓百德滿腦都係《北非諜影》裏面堪富利保加做嘅型格酒吧老闆。嗱，出事嘞！
仔女叫住佢：家規呀，阿爸！但阿爸腦裏只有堪富利保加。結果佢集合咗幾個「堪富利保加」，揀咗個城中核心區寫字樓開舖，該區圍住都係銀行、律師行同會計師行，嗰度返工嘅二萬五千人幾高薪都有。卓百德當時自己心諗：今次無死錯人。
點知，計劃書只係紙上談兵，當年未有facebook未有twitter，客流始終做唔起，搞到唔夠流動資本經營，再加埋間餐廳裝修竟然唔符合消防條例。最終，佢嘅投資亦全盤蝕光。呢次教訓係：若想搞飲食業，不如買麥記股份好過。
余絲韻