孖妹Ｓ檔案：股壇聖典信這得救

港股難搵「長情」對象

祝：翱騰投資管理（香港）董事總經理 祝振駒

彩兒：股神嘅價值投資法精粹係長線投資，唔會着眼於股價每日嘅變化，即使投資者深明道理，每日都仲坐唔安、瞓唔落。你管理嘅翱騰兀鷹基金主力投資港股同美股，過去三年仲有2.76倍回報，你實有獨特見解喇。

基金要「交數」 有贖回壓力

祝：巴菲特喺第二次世界大戰後，美國高增長年代開始發迹，而且佢一投資就幾十年，同一般人唔同，好難跟足佢做嘢。再者，佢用上市公司資金嚟投資，算係「自己錢」，唔似得一般互惠基金要應付定期嘅贖回，無贖回壓力，所以好難Apple to Apple咁比較。

Kitty：股神認定美國係投資金礦，仲睇好長線前景添！

祝：美國最吸引專才，又係資本主義成熟嘅國家，消費人口巨大，所以投資機會同選擇較多。不過，將投資美國嘅策略套用喺港股實唔Work啦，巴郡收購企業嘅首要條件係大型收購，稅前利潤須至少有7,500萬美元，呢類公司管理成熟，且擁有一流管理層，要找出符合條件嘅港股殊不容易，可見兩地市場有別。

彩兒：佢仲話「從長期投資角度而言，股票並非高風險資產」，我班姊妹話完全理解唔到囉。

祝：港股市場深度不及美國，熱炒行業變化急速，有唔少家族企業及國有企業掛牌，大部分國企嘅高增長係隨國策爆發，並非良好競爭下嘅產物；要數擁有著名品牌嘅家族企業，除中國旺旺（00151）及恒安國際（01044）外，都數唔出幾多間，所以要喺港股搵值得持有二十至三十年嘅股份邊有咁易。股神揸重外資保險股，如果「跟風」喺○七年53元高位買入國壽（02628）並持貨至今，有排都未返家鄉啊。

騰訊（00700）應該係香港目前唯一一間值得長揸嘅公司。佢有創新力，雖然有唔少嘢係集各家之大成，但佢勝在有規模效應，推出新業務又可以靠WeChat推廣，同時佢仲漁翁撒網咁投資小微企，從而將業務橫向伸展。如果要喺阿里巴巴集團同騰訊任揀其一，我實揀後者，最重要係，佢一向照顧小股東，所以可信性高啲，我唔睇好阿里集團，已經沽出全部持股。

Kitty：Day Trade同「估市」係股友每日嘅「功課」嚟，股神竟然叫人唔好喎。

祝：香港絕大多數人都係交易過度活躍，咁多中小型股又好難Buy and Hold嘅！雖然無人可以每次都估中個市，但係身處香港市場唔多唔少都會估吓，其實大家可以在日常生活中得到靈感，如果人人等緊出貨，連街市師奶同小巴司機都同你講股，咪應該Feel到見頂，不過，我就會用統計學去計吓數。

踏入三月，唔少投資者部署炒業績，我都係，但我短期睇好科網股，首選是偉仕控股（00856）及通達集團（00698）等，預計佢哋應該攞到「靚仔」成績表。

散戶宜自訂交易守則

吳：康宏資產管理業務拓展及投資管理董事 吳方俊

Kitty：股神啲投資理念聽落簡單到我唔信，但跟住佢落盤嗰陣頭都大埋！

吳：巴郡基金規模實力雄厚，所以有牙力影響政府決策，在「落刁」時條件優厚，並非一般投資者學得嚟。一般人資金有限，在機會成本下做投資，落決定時唔會咁爽手。此外，市場參與者嘅行為係無得估，如果要喺恐懼與貪婪中攞平衡，就一定要制訂細緻嘅投資機制，令自己果斷決策，有止蝕紀律，並學習股壇神手嘅分析方法，而唔係盲從佢哋嘅預測結果。

有極高贏面才出手

一般散戶習慣參考專家意見落盤，短炒都係家常便飯，然而，一個分析員可以估中七成方向或者已經好勁，但以此成功率操盤其實唔夠，應要有極高贏面先出手，唔係盞做多錯多。簡單舉個例，投資者可以統計出以唔同市盈率（P/E）投資本港大市嘅三年及五年回報率，得知大約贏面，從而假設在8倍PE便分段入市；而在15倍PE便分段沽出嘅機制。

彩兒：我唔少股友覺得美股見頂，股神仲咁老定做「大好友」。

吳：股神睇法極長線，對當地市場非常熟悉，佢分析嘅角度同睇法與別不同，個人認為美國就業及其他經濟數據偏好，資金維持寬鬆水平，加上生物科技及醫療企業增長強勁，預計可帶領經濟爭取長遠增長；短線睇，美股估值偏貴，但仲係我首季睇好嘅市場之一。

根據往績，美股即使經歷股災，但長線睇仲節節上揚，表現仲好過美債。正因美國是成熟市場，好似一間內地上市嘅鮑魚養殖公司，幾億條苗神秘失蹤嘅經典事件實唔會發生，但香港掛牌的上市公司眾多，買穩陣嘅藍籌股就可以逢低即吸，講到中或小型股，就最好靠基金經理定期做公司探訪，去幫你做篩選喇。

巴菲特股東信精華

策略篇

「我的經商經驗有助進行投資，而投資的經驗亦使我成為一個更好的商人，兩個身份相輔相成，同時一些真理只有經歷過才可真正領悟。」

「我們對Tesco的投資太拖拖拉拉，這是一個巨大的錯誤，不夠決斷，早應清倉。去年我們沽出全部Tesco股份，稅後損失是4.44億美元。」

「一些投資者的自身行為可令持有股份變得高風險。交易頻繁、企圖估計市場動態、不充分分散風險、向基金經理及投資顧問支付高昂而不必要的費用、借錢投資可損害終身持股可能帶來的收益。」

「顧問、經濟學者或電視評論員，當然包括我和拍檔芒格，都不能告訴你市場出現亂局的時間。」

「股份短期的大幅波動為投資者帶來損失，惟此並非風險，只要建立可靠的多元化組合，長期而言股份投資是值得的。」

預測篇

「縱使我們經常投資海外，美國才是投資者的金礦，已被發掘的寶藏僅冰山一角，我和芒格生於美國，對此優勢無限感恩。」

「由過去五十年經驗可見，將錢投資在分散的美企組合，較投資美元相關的債券更安全，料此經驗在下世紀亦會延續下去。」

「美國經濟活力將繼續展現其魔力，繁榮從來不會來得一帆風順、沒有波折。我們將會定期地對政府表達不滿，可是，最能夠確定的是，美國的好日子尚未來臨。」

彩兒 & Kitty

若有料報畀彩兒同Kitty或有嘢問，可電郵money.biz@on.cc