對沖國度:踩場沽空風險極高

近年傳媒訪問愈來愈刁鑽,已經不是問睇法,而是直接問如何部署,其實有點是屬於軍事機密,不過人在江湖,自己只是small potato,人哋好奇可以算是畀面。點做理論上比點睇會更有參考價值,實際上未必。

最簡單近期戰績絕對會影響打法,例如贏到開巷便有本錢冒險,但同樣情況有些人卻反而可能縮番條槓,寧願穩穩陣陣勒住過終點。

如果不知道受訪基金經理的性格及近期手風,只問部署,得回來的答案可能更加誤導。試過有記者便直接指筆者太過飄忽,難以捉摸,滬港通開車初期,表態是只會有限度參與,結果後來卻愈炒愈投入,甚至明知H股平幾成,一樣喪追A股。自己最初當然是誠意回答,只不過世界是動態的,當日減息撻着A股狂牛,識時務一定是趁亂去撈油水,事態的發展,根本是始料不及。

另一個例子,滬港通容許沽空,這一刻自己的部署是絕對不會參與,無謂冒險被「中國大媽」亂棍打死,當AH差價可以短期內擴闊三成,即是進一步再擴闊到七八成也有可能,A股是一個封閉了的中國人主場,點開都得,當然不應該踩場沽空,隨時輸死未天光。

可是假設A股忽然逆轉,急跌三四成,自己很可能會追打落水狗。因為暴跌的話,中國大媽屍橫遍野,再也不構成威脅,股價屆時在低位,卻會傾向易跌難升,所以講得太死,又或者讀者諗得太死,其實是相當無謂。有時傳統的訪問方法,簡簡單單集中在睇法,更加會有效率。

豐盛金融資產管理董事 黃國英(作者為註冊持牌人士)