絲絲講場：港交所秘道變隨意門

地點保密 好使好用

話說已有多年歷史嘅交易大堂，原來設計有啲似以往打仗，地底有如地下城，有好多條「秘密通道」往來地面及各個主要地方。好想知啲「秘密通道」？講到明係「秘密通道」，梗係唔公開得，所以咁多年嚟，都冇乜人知道「秘密通道」嘅入口與出口，好神秘。

查實港交所交易大堂話晒係本港股票市場重要地標，設有多條「秘密通道」緊急情況時用好正常。咁乜情況下至會用到呢？主要都係招待各國領導人嚟參觀交易大堂、發生火警、進行大型搬運、或者有佔領衝突時才開放使用。

當然仲有，當有傳媒要等港交所啲老頂做採訪時，若老頂唔想做訪問，就可安排佢哋施施然從「秘密通道」離開，然後就向傳媒話「老頂走咗喇」，又唔使得失傳媒，「秘密通道」果然好使好用。

余絲韻