絲絲講場：滙控150周年亮燈沖喜

點沖喜？中環滙豐總行除咗新添咗兩頭石獅子，大廈後邊又進行一項新工程，原來為慶祝150周年，用2,652盞LED燈架起三面展示牆，又將大廈外面嘅燈光系統全面升級，計劃從今晚七點開始晚晚喺總行進行燈光匯演，與「幻彩Fing香江」相呼應。

紀念鈔周四有得買

2,652盞LED燈好晒電？絕對唔會，事關滙控今次用嘅全部係節能燈，比普通燈膽慳一半電能，完全有顧住企業社會責任。計絲絲話，今次燈光匯演最緊要Fing走晒滙豐之前啲霉氣！

絲絲又聽聞，滙豐為咗紀念150周年而發嘅紀念新鈔，會喺周三公布細節，周四供大眾申購。滙豐例牌話「不予置評」，150周年紀念新鈔聽講面額150蚊，撲定唔撲，你話呢！

歐智華官司有隱情

至於歐智華單欠差餉官司，好似有隱情。絲絲收到風，話歐智華夫婦出租間屋時，租約有寫明差餉由租客負責，所以歐智華對欠差餉一事並不知情，確有啲啲無辜。咁究竟邊個租客累歐智華？租客來頭唔細，任職四大會計師行嘅。到底係邊間？你估吓。

余絲韻