期指觀瀾：大市回調機會不低
筆者果然批中，昨日成個市擺出一幅好消息出貨格，三月期指開唔到兩萬五，比估計更弱，以24,930點開出，隨即見一見24,987點的全日高位，淡友很快出手施加壓制，尤其九點五十分左右見較大手沽盤拋出，期指在短短六分鐘內，由24,834點直插至24,587點。
在連鎖反應下，惹來唔少好倉客冚倉，結果十點未夠，全日期指高低位已出現，之後期指曾經反彈見24,906點，但經過V形先急跌後急抽下，好淡雙方都步步為營，期指在24,748至24,854點之間逾百點內，橫行直到收市，日市期指收24,803點，低水84點。昨日動用三分一注碼，按預定計劃開市AO價沽，可惜當見24,600點失守冇食胡，轉個頭已彈番上24,900點邊。
過去幾次人行放水，其實已經反高潮多過升到尾，好似上次炒降準，恒指亦高開低走，同昨日走勢好似，之後恒指連續幾日回吐，由高位25,048點回到24,226點先止跌，共回調822點。假如再翻版，以昨早市恒指24,997點高位，博今浪見頂回番600至800點其實唔係奢望。
事實上，今次減息連二月初降準所出現的高位都去唔到，好友失望是理所當然。昨日本來一心短跑，最後都改變主意，實行以期指升穿25,000點作止蝕，淡倉睇多幾日至算。
John Mullen