孖妹Ｓ檔案：魚缸股友炒出新年財

彩兒：唔拜年都唔知，原來各位叔父咁關心我哋嘅感情狀況，勾起我啲傷心事添。你快啲諗計幫我轉移視線啦。

Kitty：計我話，新年發到個新年財先係最開心！港股開咗市成個星期，A股過去三個交易日嘅表現亦不過不失，唔知股友們袋咗錢落袋未？

散戶Nancy認為中石化業務夠多元。	新鴻基金融財富管理策略師 溫傑	劉生（右）同劉太最鍾意炒內銀股波幅。

溫：新鴻基金融財富管理策略師 溫傑（Kenny）

熊：友達資產管理董事 熊麗萍（Conita）

散戶Nancy：睇好中石化伺機買

我多數玩細價股，最近買華富國際（00952），等咗兩日都無升，咪沽咗佢囉！點知一沽完佢就升，真係激氣！要平手離場，仲蝕埋手續費添呀！

散戶張生（中）炒殼股可謂得心應手。

友達資產管理董事 熊麗萍

深圳國際（00152）就長線啲，因為股價穩定，又年年派息。之前我都有買中石化（00386），不過油價大跌拖累油股表現，所以我都沽晒喇。如果油價上番50蚊樓上，我諗都買得過嘅。「三桶油」入面都係中石化好啲，業務多元化，去年成功引入民資，依家又有分拆概念，最近仲聽聞內地油企會合併。

專家錦囊：油價未升 油股炒上落

彩兒：美國公布原油庫存量再創新高，油價短期回升睇嚟「凍過水」。

溫：無錯，油價見底未真係好難講，估計短期亦難以大升，所以買油股預咗要等吓先。喺油價未真正回升前，相信油股價格只會區間上落。農曆新年前傳出內地油企合併消息，令板塊忽然炒上，但我認為油企合併以方便「走出去」嘅效益唔大，因佢哋唔似南車（01766）、北車（06199），業務冇過分重疊。中石油（00857）同中石化都有國企改革概念，較為可取；但前者應更勝一籌，因未有宣布實質改革方案，可塑性大啲。

熊：我就比較睇好中石化，因為集團去年為旗下銷售業務引入民資，若相關資源能有效運用，會對未來收入有幫助，但需時反映。至於內地油企合併，我認為機會唔大。合併效益喺邊呢？睇唔到喎。

散戶劉氏夫婦：內銀股靠波幅取勝

我哋一人一個股票戶口，各自揸住九隻內銀股，除咗四大國有銀行外，仲有招行（03968）、交行（03328）、徽商行（03698）等等。光大銀行（06818）就真係由馬年尾賺到羊年頭，齋玩波幅，上星期頭兩日已經賺咗4、5轉。逐隻輪住玩，每次升2至3%就走，都有幾百一千執吓。連埋老公嗰份，我哋上星期加埋，都有成萬蚊落袋，好開心喇！

我哋依家淨係對內銀股有多啲信心，始終有「阿爺」撐腰吖嘛，而且今年內地採取寬鬆貨幣政策，對板塊都有利。滙控（00005）？我哋一早對佢死心啦，○七年已經將資金全部轉買建行（00939）。中行（03988）股價表現由去年中開始好似脫胎換骨咁，所以我哋都睇好。中長線股份，我哋仲買咗安碩A50（02823）同港交所（00388），因為睇好A股後市。

專家錦囊：內銀估值吸引可持貨

彩兒：內銀嘅壞帳問題令人擔憂，淨息差又持續受壓，佢哋揸咁多內銀股咪好蝕底？

溫：呢兩個負面因素已經係市場預期之內，亦一早反映於估值上。我認為內銀股依然吸引，估計今年內銀市帳率仲有擴張空間，人民銀行亦會維持寬鬆貨幣政策，所以建議有貨嘅散戶不妨揸耐啲。揀股方面，我首選都係中行，因為估值偏低，而且相信該行不良貸款比率升幅不至於市場預期咁差。

Kitty：捕捉A股中長線升浪，買A股ETF同港交所呢個策略又掂唔掂？

溫：唔怕話你知，其實A股ETF過去三至六個月嘅估值已經由溢價轉為折讓，所以依家好抵買，既可憧憬受惠A股上升，又可憧憬受惠折讓收窄，實現雙重獲利。而港交所就係最直接受惠中、港股市向好嘅股份，預期年內落實深港通係最大催化劑，所以都OK！不過，由於去年推出滬港通時，股份升幅已「透支」咗往後兩地股市進一步融合嘅契機，所以今年股價只會逐步向上，而唔係「大躍進」。我建議分段買入，175蚊第一注，165蚊第二注，目標價195蚊。

散戶張生：炒殼股五日賺萬元

我最近靠隻殼股，兩日贏咗幾千蚊，如果計埋馬年最後兩個半交易日（二月十六日至十八日），五日內，剩係呢隻股賺幅已有五位數字，另外亦吼緊一隻私有化概念股湖南有色（02626）。我炒股一向超短線，最多只會揸一至兩個月；個市咁難玩，唔係咁邊有得賺？業績期就快到，我想避開佢，等出晒業績先再部署。自己以前都有部署業績期，買過比亞迪（01211），不過蝕錢收場，所以呢兩年冇再炒業績喇。

專家錦囊：炒業績要睇行業前景

Kitty：張生上星期抽中咗封500蚊開年大利是喎，睇嚟今年財氣好旺！不如你過多幾招部署業績期嘅必殺技畀佢，等佢旺上加旺啦。

熊：炒業績要留意兩樣嘢，一係股價反映晒盈喜或盈警消息未，二係市場對行業或企業前景嘅睇法，例如行業係咪即將走出谷底。我嘅心水股之一係中聯重科（01157），預計市場對重型工程機械需求增加，行業供過於求情況將改善，而且公司產品組合有所調整，明年業績有望轉勢。股價仍然有上升空間，投資者可趁公布業績前候低吸納。

一眾基建股如中國鐵建（01186）及中交建（01800）亦係焦點，但建議待公布業績後先伺機吸納。另外，電訊及網絡相關股份亦值得留意，如中移（00941）及騰訊（00700）。

Kitty & 彩兒

若有料報畀彩兒同Kitty或有嘢問，可電郵money.biz@on.cc