絲絲講場：Disney公主裙轉款博大賺
《魔雪奇緣》（Frozen）首主題曲「Let it go」，唱到今年新年變咗「Let eat糕」。絲絲識唔少做咗阿爸阿媽嘅朋友，過去一年相關題材嘅衫褲鞋襪、書包、揮春甚至廁所板都爭住撲，以為Disney喺三月上映套新片《仙履奇緣》（Cinderella），就可以鬆一口氣。
點知新片會包埋廿幾分鐘嘅「Frozen外傳」！條Trailer最近一出，家長立即意會到「大件事」，事關兩位主角Anna公主同Elsa女王換咗條新裙，畀屋企位小公主發現就唔得了！放心，絲絲啱啱Check到，網上依家有得預訂。
去年尾曾炒貴10倍
睇住家長也瘋狂，絲絲都想講句：畀人抖吓得唔得呀？但對Disney而言，Frozen絕對係隻金蛋，點可以畀佢停？單係全球電影票房已錄得逾12億美元，係史上最收得嘅動畫。Frozen仲帶起Disney兩季盈利，上年十一月單係北美就賣出300萬條Frozen公主裙，啲裙又會閃燈仲有歌播，斷貨個排試過喺eBay炒貴10倍。家長們，加油掃貨啦！
余絲韻