港交所（00388）行政總裁李小加一向鍾意小朋友，除咗係三個仔女嘅爸爸外，港交所有乜大製作，佢都愛以小孩嚟做比喻，好似滬港通出台，佢就曾經以「初生嬰兒已經懷胎十月該生了」嚟形容。至於小加總裁最新搞作，就係同小朋友比賽鬥講廣東話！咁都得？
話說港交所日前嘅羊年開市儀式，特別邀請咗一班小學生嚟表演敲鼓，為開市助興，小加總裁不知睇得幾投入。
學生表演完之後，小加總裁仲主動邀請其中一個以普通話為母語嘅小學生，比賽講廣東話。
點知，小朋友好直接話冇興趣，反而最想港交所喺下年再請佢哋嚟表演敲鼓。噢！雖然食咗檸檬，但小朋友畀嘅，小加總裁大概唔覺酸只覺甜。
小加總裁呢排真係好似愛上廣東話咁款喎，除咗羊年首次以廣東話同股民拜年外，又同小朋友「越級挑戰」廣東話。睇嚟，佢嘅廣東話好似有啲進步。絲絲下次碰面，要考考佢先！
余絲韻