絲絲講場：財圈Fun析 羊年係咩羊？
唔經唔覺尋日已經係人日，絲絲當然把握拜年機會順便逗利是，但就發現今年大家對羊年都有一個疑惑：羊年隻羊，究竟係乜羊？
中文博大精深，一個「羊」字，乜都包晒； 但原來「羊」呢種動物對「老外」嚟講，英文可以係「Sheep」（綿羊）、「Goat」（山羊），又或者「Ram」（公羊）。
何達德較鍾意山羊
咁宏利金融（00945）行政副總裁兼大中華區總經理何達德（Michael）呢位「老外」，對呢堆羊，又有咩見解？Michael話，感覺上綿羊就比較鍾意瞓覺（Sleepy），但公羊呢就明顯Man啲（Masculine），不過佢自己都係鍾意用番「The year of goat」喎。
劉怡翔循歷史解讀
至於我哋嘅財庫局副局長劉怡翔（James）就話，歷史上中國大部分羊都係山羊種，所以佢同Michael一樣，都係「The year of goat」嘅粉絲。
其實，呢個難題就連美國總統奧巴馬都覺得好困惑，佢上星期同中國同胞拜年時都打趣話：「無論公羊、山羊定係綿羊，反正就祝大家新春快樂啦。」
余絲韻