Market Insight：高息股穩陣之選

受加息唔會提早殺到埋身的言論刺激，隔晚美股三大指數抽升，道指及標普500指數分別升0.51%及0.28%，再創歷史新高，十年期美國國債孳息返回2厘樓下，跌0.07厘收報1.98厘。

耶倫講話的擺位，古勝覺得佢亦鷹亦鴿。她重申美國經濟復甦之餘，亦都講明修改前瞻性指引唔代表好快加息，決定權仲係落番喺一五年鴿派主導的聯儲投票委員手上。事實上，今年一開始全球央行都已預先築起防波堤，怕咗歐洲央行的量寬措施，猶如引發洪水壓境一樣。

古勝冇點你

萬里長空

期望管理預留彈性

瑞士央行放棄捍衞1.20瑞郎兌1歐元匯率死線，丹麥同瑞典減息減到去負利率，在歐洲成熟國家以至亞洲，都開始開打貨幣戰爭之下，聯儲局將加息時間表講得太死，實在無乜着數。

一旦公眾認定，聲明中刪除「耐心等候」字眼後，三次會議就開始加息的話，唔單止貨幣政策及市場期望管理會無晒彈性，一旦美元急升或者經濟復甦再開慢車，要延遲加息，就會畀人貨幣政策搖擺不定的印象，倒不如今日提早帶定頭盔，重申加息決定權唔係掛鈎失業率，唔係前瞻性指引修改打後「三次會議」開始好過。

希臘危機總算大步檻過，繼德股後，隔晚英、美股市齊創歷史新高。全球雖然被通縮陰霾籠罩，但股市對於全球各國的印鈔機加班，甚為歡迎。不過，中港股市卻是有點拉牛上樹，昨日A股放完農曆新年長假後復市反高潮，紅盤低走，滬綜指最終跌18點收報3,228點收市，港股力保不失有28點進帳，報24,778點，但看着隔晚耶倫講話後急升的美股，睇好者恐怕已失望到極。事實上，昨日整體大市下跌股份稍多於上升股份，市況氣氛其實麻麻。

港股恐會再陷悶局

一來春節前，中港股市在成交淡靜下，已經由低位連升多日，基金經理眼見之前人行降準，中資股都唔多谷得起，放完假返來，立即衝入去高位接貨興趣唔大，而且A股成交自去年十一月底、十二月初之後拾級萎縮，似乎打擊內地券商濫借之後，新錢入市有明顯減少迹象，這難免限制了後市再爆上去的能量。

值得留意是，歐美股市炒到出煙，不過，明顯本地基金對後市態度依然偏向審慎，對風險資產胃納，與歐美基金相比形成強烈反差。

君可見，昨日唔少資金追逐高息股，如公用股的中電（00002）、電能實業（00006）及粵海投資（00270）；房託基金（REITs）有領匯（00823）、置富產託（00778）及冠君（02778）；電訊股有和電香港（00215）及數碼通（00315）等。

在下相信，因有耶倫的演說，被視為無風險溢價的美債息回落有關，不過幾個防守板塊的高息股一齊郁，直覺上短期後市好難會威得去邊。事實上，內地減息同降準兩個勁招都出咗，短期阿爺似乎無乜新板斧，港股又再跌入泥漿摔角的悶局機會唔細，繼續買住高息股，立於不敗之地不失為上策也。

昨日焦點係財爺預算案，最有興趣莫過個名起得夠晒「前衞」的未來基金。曾財爺爆響口，話回報會畀金管局管理的外匯基金為高，呢吓反手抽擊，打得金管局陳德霖「應一應」。

投資回報講就兇狠

話說上個月，外匯基金發表一四年投資成績表，回報率得1.4%，已經畀人笑衰過散戶，甚至盈富基金（02800），就算金管局將全部錢乜都唔做推落去買美國十年債，回報都唔止呢條數咁話，每年出糧九百幾萬的陳總𤓓到爆。

話說回來，舊年唔單只金管局投資表現肉酸，散戶以為叻叻的對沖基金，八成以上都交唔到功課，大家熟悉的國家主權基金，出名如淡馬錫，一四年三月底止年度回報僅得1.5%，同過去十年複合年回報近9%相比，都水瓜打狗唔見一截。

即使股神巴菲特都唔敢話年年可以跑贏個市，至於 任內年年預算年年估錯的曾財爺，憑乜話未來基金表現一定好過外匯基金呢？在下就覺得甚有寶藥黨feel，講到尾，氹咗市民落疊先，到時唔夠數又係另一回事。

古勝