情人節收花，係身份嘅象徵，十個有九個都想畀人睇到，但今年撞正禮拜六，好多office都休息，囡囡又未必個個都鍾意攬住束花遊街，做人男友或老公嘅難免有啲頭痕，唔知有冇影響花店生意呢？答案竟然係冇影響！絲絲平時幫襯開嘅中環國金花店「花奴」，負責人Irene話，情人節前一個禮拜營業額有成20萬元，係平時嘅兩倍，訂單同往年差不多，不過少咗客「講價」。吓？買花都會有人講價？絲絲都係第一次聽。
有無試過三人嘅情人節未？法興環球股票產品部副總裁蔡秀虹（Eva）今年第一次試：「下晝先同『小情人』（約8個月大嘅囝囝）做baby yoga（母嬰瑜伽），夜晚就同大、小情人一齊出外食飯。」點解揀啲咁特別嘅日子做baby yoga？仲要係第一次做？Eva答得直接：「少人、易啲book。」佢又提到，過去印象最深刻嘅情人節禮物，係彩虹玫瑰，因之前未見過，覺得好特別。唔知佢嘅「大情人」今年又會有乜新驚喜？
就算係二人世界，亦唔單只有行街食飯。國泰君安國際投資諮詢部副總裁王昕媛（Kate）就約咗男朋友，今日會先留喺屋企砌puzzle。重點係個puzzle印咗佢哋兩人嘅樣，兩個人一塊一塊咁一齊砌，sweeeeeet！佢哋仲打算砌完之後，一齊去聽演唱會。咁，要砌快啲喇。
情人節出街慶祝，難免人多兼貴又難訂枱，AMTD證券業務部總經理鄧聲興今年就決定同太太喺屋企「煮飯仔」，晚餐仲幫襯咗海鮮速遞食材添，聽講價錢較往年貴一成幾。
不過，今日亦未必個個都會慶祝。大華繼顯（香港）策略師李惠嫻就呻男友唔識Do，一啲安排都冇。佢話，同男朋友拍咗拖咁多年，除咗第一年出去食情人節晚餐之外，之後嗰八年都無慶祝過。唔，絲絲估，或者佢男友視日日都係情人節吧！
今日呢個特別日子，送嘢畀另一半，咪以為乜都送得，金利豐證券研究部執行董事黃德几就教路，千萬唔好送啲升級或自我增值產品，好似課程、減肥、facial之類，否則後果……大家明啦！無新意的電子產品都同樣唔好喇！
余絲韻