臨近農曆新年，又係內地企業派發年終獎金同花紅嘅大日子，阿里巴巴傳來年終獎金高達100個月人工，恨死隔籬，尋日再嚟一單，內地企業上海掌門科技老闆豪氣到，某部門凡入職夠4個月嘅員工，就能獲得一輛特斯拉（Tesla）電動跑車。
話說掌門科技行政總裁陳大年前日向員工家屬發感謝信，宣稱該集團旗下WiFi萬能鑰匙團隊入職超過四個月嘅每一個員工，都可以得到一輛特斯拉跑車。
據內部人士爆料，WiFi萬能鑰匙員工有40幾人，可以攞到上述年終獎嘅就有36人，齋買車都可能要超過3,000萬人仔。
陳大年仲喺封信度話，喺一四年掌門科技由一間負債1億嘅公司，變成一間零負債兼年收入過億嘅集團，又號稱WiFi萬能鑰匙總激活用戶量超過5億，月度活躍用戶達到2.3億，市值突破10億美元。
何解佢出手闊佬到用特斯拉電跑嚟做年終獎？聽內部人士話，皆因陳大年想留住人才，兼想吸引更多人才加盟。
陳大年個名，外界並唔陌生，佢最常被提及嘅身份係「盛大網絡陳天橋個細佬」。其實陳大年亦係盛大網絡嘅創始人之一，盛大分家後，無線業務獨立出嚟成立咗掌門科技，由陳大年控股兼做埋CEO。
余絲韻