Portwood Capital主席卓百德，以成功預言九七年亞洲貨幣爆煲而聞名於世，有時好難想像呢類星級分析員投資都有燒鬚時，交過唔少「學費」。
最近卓百德喺自家出版刊物聲言要數自己五項最羞家、幾乎唔願再記起嘅投資，頭炮就爆自己喺一間澳洲農業及天然資源公司嘅「滑鐵盧」。
佢識呢間公司，係由一份研究報告而起，之後佢做過少少所謂資料搜集就入股。點知呢間公司以「龐氏騙局」式運作，一層層咁用新投資者嘅資金供應畀舊投資者套利。結果，呢間公司倒閉時，點算總共有4.3萬個投資者，總共損失18億澳元！卓百德投入呢間公司嘅錢全部蝕光。
以卓百德今日江湖地位，根本唔需要自揭瘀事，連佢自己都話，每次記起呢啲錯誤，都仍感到煩厭。不過，為咗令大家有反面教材，認識、接納咩嘢叫做從錯誤中學習，佢唯有身先士卒啦。
咁呢個故事嘅教訓係咩呢？係事前資料搜集唔夠？錯！卓百德話呢個唔係重點，佢話就算傳奇基金經理普爾遜都曾經喺嘉漢林業「踩地雷」。嗰次最重要嘅教訓，其實係冇嚴格遵守止蝕紀律！如果當初佢有喺25至35%止蝕位走人，就唔使輸清。各位，學到嘢未？
余絲韻