Market Insight：中廣核電炒味漸濃

數數單在歐洲，丹麥、瑞士、瑞典、德國、芬蘭、奧地利，荷蘭、法國及比利時所發行的兩年期以內債券，經已統統出現負息情況，丹、德及瑞士更係五年期都見負息。

如果看官唔明，簡單講投資者要畀息先可經國債借錢畀這幾個國家。對於我等一世人都以為借錢有息收的普通人，當然好難理解借錢畀人仲要罰息的原因，何解唔直接攞現鈔存入保險箱，或者索性搵個安全的山洞放入去，傻到蝕息借錢畀人。

古勝冇點你

萬里長空

貼錢買債輸少當贏

負息債券的出現，正好說明依家全世界經濟低迷，通脹似有還無，央行亂石投林大打貨幣戰之下所產生的副作用。大家眼見國家可以賴債，銀行可以倒閉，西方存款保障又會有上限，債商及超級有銀之士，情願畀多些少錢買財政實力相對雄厚國家的債券，當交保護費，換取特定時間內可以安安全全將大部分本金取回，輸少當贏。

各國央行鬥掟錢下，人行意料之外的降準已見到對股市刺激作用大減，A股凍結資金創近五年新高下，昨日人行繼續放水舉動，為14及21日期合共進行1,600億元人仔逆回購。A股再彈，滬綜指升15點收3,173點，但見港股升至245,00點附近已無以為繼，假期氣氛影響基金入市興趣，恒指收市升幅收窄至107點報24,422點，沽空比率彈升至11.2%，是大半個月以來最高。

睇番經濟數據，一月中國官方PMI跌穿50盛衰分界線，是二十八個月以來首次，通脹收縮到得0.8%，是○九年以來最低，同時上月進口急跌降近兩成，可見內需萎縮情況嚴重。古勝賓架老友北上與內地公司會面，返香港話反貪的影響估唔到一啲都未減，春節前三公消費跌到落冰點，今年內地單位傳統的送禮、花紅、年夜飯統統變成絕響，照咁睇內地二月數據更差都唔奇。

炒放水選擇唔算多

其實，中國貨幣供應轉向寬鬆係鐵一般事實，只係凡事有比較，其他國家做得更盡更狠，人行對比慢半拍，睇怕今年除繼續減息、降準之外，要加快人民幣貶值，先至有較大的機會保七。

按中國放水的方向去諗，羊年之初依然值得睇好內房股，一來短期樓價見底，二來按揭息回落點都有幫助，唯獨人民幣行返轉頭，之前狂發的美元債會唔會帶來匯兌損失，是當中隱憂，故只宜選財政較佳、項目集中在一線城市的兩三隻龍頭內房股。

再數落去，人仔低息期，業務具防守及派息能力較佳的，例如電訊股會是必然之選，昨日街外傳三間電訊商重組，雖然被多方面立即否認，但見隻中移（00941）完全唔肯回，可見基金經理的睇法有幾堅定，至於中資金融股，內銀股看來已炒到水尾，睇落唔夠內險股吸引，A股勁升後，平保（02318）及太保（02601）的投資收益表現較值得憧憬。

中央向環境染污開戰，大力推動可潔淨能源發展，重啟核電投資後，本港市場唯一選擇，是佔內地核電市場近三分二份額的純核電營運商中廣核電力（01816）。公司舊年底以每股2.78元上市，迅即被MSCI指數睇中，炒到上3.66元，之後拾級向下，一來基礎投資者及指數基金已經坐齊貨，無乜見新錢入貨，其次早前個市驚內地火電供大於求，影響核電設備使用率，形成中廣核電投機味道急降。

內地市場優勢明顯

不過，話晒做半獨市生意，中央又承諾咗全國核電發電機組容量，一四至二○年間會增加220%，基金唔買都無其他選擇。近排見其股價成個月在3元邊附近徘徊而跌唔落，雖然一五年18.5倍PE，唔算極之便宜，惟勝在故事獨家，而其他潔淨能源股，好似龍源電力（00916）都講緊15至16倍PE，靜咗成個幾兩個月，昨日見中廣核電終於有異動，短期不妨睇實。

古勝