萬達商業（03699）控股公司萬達集團又出手買嘢，由萬達牽頭嘅財團，豪擲10.5億歐元收購瑞士盈方體育傳媒（Infront Sports & Media AG），萬達仲佔最大份68.2%添，實行瞓身搞體育事業。據了解，萬達今次同三間知名機構，砌低超過十間來自全球的競爭對手，攞得盈方嘅控制權。
至於盈方係乜，相信好多香港人都未聽過，盈方係由足協（FIFA）總裁及行政總裁白禮達個姪仔Philippe Blatter揸fit，據聞係全球第二大體育市場行銷公司，絲絲聽聞盈方同時會搞埋大型體育節目製作同轉播，間公司舊年嘅收入就超過8億歐元，加上仲有26個國家及地區FIFA足球賽事轉播獨家銷售權直至二二年，所以話已鎖定幾年後嘅部分收入。
萬達集團仲話，併購盈方對公司有重大意義，首先係可以推動內地體育產業發展，其次先係益自己，仲話符合萬達想做大文化產業嘅大方向，仲有梗係有利推行萬達跨國策略。
余絲韻