身處網絡時代，個個都有一部智能手機喺手，好多唔同嘅服務都電子化，其中就包括「Call的士」服務。以前，大家都要喺街截的士，但今時今日，手機嘅應用程式已經可以幫到大家快速咁搵到的士。不過，叫車Apps愈來愈多，各間公司都各出奇謀嚟搶客。
為咗吸引顧客用你的Apps可以去到幾盡？美國嘅Uber就真係大犧牲喇，呢間公司為咗喺香港搶灘，推出咗「燒錢」優惠。所有Uber嘅用戶都可以喺今個星期三同星期四，即係今日同後日免費搭兩程的士！
至於馬雲嘅阿里巴巴早前多次參與快的Taxi數以億美元計嘅融資，多得阿里注資先至可以同Uber喺香港打對台。聽日快的Taxi都會推出積分商城兩倍嘅優惠計劃嚟吸引大家。唔止咁，絲絲仲發現快的Taxi喺yahoo有優惠券，凡係喺廿八號之前下載快的App同登記做會員，又喺三月十五日之前成功用個Apps叫車並乘搭的士一次，用戶就可以攞$100超市現金券啦。嘩！咁抵，連搭開地鐵嘅絲絲都即刻想湊熱鬧呀！
余絲韻