期指觀瀾：好淡雙方放軟手腳
中國放水反高潮之後，加上希臘危機又被借題發揮，近日大市借勢回吐。但春節假期臨近，成交開始縮減，個市就連跌都無力。昨恒指早市見一見24,422點即市低位後，全日百餘點內上落，升7點收24,528點，主板成交640億元。
即月期指以24,456點開出後，好快在24,396點搵到支持，淡友本來想壓制期指在24,560至24,580點樓下，惟A股高收，好友三點半曾經攻到上24,621點，但現貨成交唔夠，始終限制挾淡的威力，日市期指收24,528點，成交進一步縮減到唔夠四萬張。
技術上，恒指10日線已掉頭向下，去到24,617點，與昨日即市高位阻力接近，恒指險守20日線24,494點樓上，否則會是去年十二月二十二日的升浪至今首次低於20日線收市。昨日無論港期及國期，若未能把握到開市一刻入手，十一點期指場大有塘水滾塘魚味道。
仲有六個交易日過年，個人認為去辦年貨好過對住個市，短期肯定再衝破25,000點阻力不易，買上值博率唔高，成交奀到連跌都唔夠力。恒指波幅指數由高位21.29，輾轉去到昨日14.97見今年新低，睇怕除非外圍有風吹草動，急挫拖一拖港股後腿，否則等低位買的計劃未必可實行。
John Mullen