絲絲一向都好留意人民幣動向，日日都會Check吓中國外匯交易中心個網，尋日真係畀第一筆高開嘅交易價嚇咗一嚇，後尾發現原來係烏龍盤，好彩最後取消得番，個莊家都叫做執番身彩！
話說尋日朝早第一筆人民幣兌美元交易，開盤價勁升937點子，去到6.1510，絲絲喺電腦前面睇到眼都凸埋。後尾中國外匯交易中心宣布，原來係有莊家開錯價，之後雙方傾掂數，取消咗呢單交易，個開盤價更正番去6.2495，都咪話唔好彩。
其實開錯價耐唔耐都出現，絲絲記得一三年嗰陣，內地光大証券因為套利策略系統故障，開出咗234億人民幣嘅買盤，令到當日上證綜指一度上漲超過5%！不過光証就冇咁好彩喇，最後被迫硬食，唔止損失咗1億9千幾萬，仲因涉嫌內幕交易畀中國證監會罰咗5億幾。
網友見尋日單烏龍盤，不期然聯想起光証，忍唔住要抱不平；亦有啲同絲絲一樣心水清嘅網友寸番個交易員幾句，有人話「我股票買錯咗，不如幫我取消埋啦」，仲有網友懷疑個交易員可能係Partime，建議炒咗佢咁話喎！
余絲韻