孖妹S檔案：財圈愛侶理財心底話
講錢傷感情？未必。孖妹深信，識得同另一半講「股」惑、談「錢」程，兩人間嘅甜蜜指數隨時升得快過A股！正如我哋幾Pair財圈朋友，夫妻間理財及投資之道雖各有特色，但恩愛程度同樣羨煞旁人。趁住情人節，一於搵佢哋同大家講金又講心！
揸內銀收息唔炒匯
陳：ADS Securities零售市場銷售總監 陳健豪（Aaron）
Kitty：新婚快樂，恭喜你正式成為「老襯」！聽聞你好錫老婆，一求婚成功就同佢開咗個聯名戶口？
陳：多謝。係呀，個聯名戶口已經開咗成年幾，打算用作將來小朋友嘅教育基金，所以入面啲錢唔輸得，投資策略要保守啲，暫時都係現金為主。其實我哋兩個財政好獨立，而我個人投資策略就傾向保守，買齊晒「煎釀三寶」收息，即係中行（03988）、工行（01398）同建行（00939），反而少炒外匯。最近仲買咗啲油股。
彩兒：你太太Ruby以前係財經主播，投資實力應該都唔弱啦。
陳：佢投資策略比我進取，少買藍籌，會買異動股。有時佢會畀幅走勢圖我睇，叫我畀意見，之後佢又會自己做資料搜集，揀基本面好啲嘅板塊投資，例如醫藥股。雖則話財政獨立，但我每次投資賺蝕都會話畀老婆知，只係買股票嗰刻就多數先斬後奏，買完先通知佢。
Kitty：你咁熟悉外匯市場，唔炒外匯有啲可惜喎。應該要趁歐元大跌，幫老婆設計吓投資大計嘛！
陳：到時去旅行我幫手找數，咪當係幫佢投資囉，哈哈！本來我哋想去歐洲Honeymoon（度蜜月），但冬天去太凍，唔想旅程太辛苦，所以遲啲都想去番歐洲旅行。我最近已經開始儲緊實貨歐元喇。
老婆掌財政專買ETF
黃：金利豐證券研究部執行董事 黃德几（Dickie）
彩兒：你平日接觸咁多好股票，估計你同太太嘅投資部署，應該都由你話事啦！
黃：你錯喇，我做呢行，買股票要申報，太麻煩喇，所以我將財政大權交晒畀老婆，由佢負責主導。正所謂當局者迷，我都唔希望因為自己炒賣股票，而影響平日嘅工作情緒同判斷能力。我哋嘅投資組合比較長線，主力買交易所買賣基金（ETF），其次亦有啲內銀股收息。
Kitty：真係估你唔到。但你會唔會唔放心，成日向老婆問長問短？
黃：其實佢嘅工作本身都需要同數字打交道，所以由佢話事我唔擔心。大事我哋會一齊商量，小事就交畀佢決定啦，佢運氣好又腳頭好，好多嘢都揀得啱，而我揀得最啱嘅一次就係揀咗佢！舊年我哋買咗個新單位，都係由老婆負責揀。呢個單位要成千幾萬，真係可以供到我退休。
彩兒：你哋將由細屋搬大屋，恭喜！個樓盤有咩特別先？
黃：我哋有好多親戚朋友住喺天后，所以一直對嗰區樓盤好有興趣，最後睇中「DIVA」，係因為佢個名。 我英文名係Dickie，太太叫Eva，咁啱個樓盤名就係我哋兩個英文名嘅「合體」，好似特登為我哋而設咁。其實我哋成家人嘅英文名都可以玩接龍，加埋大女Aika同細仔Arlend個名，一家四口叫「DickiEvAik-Arlend」，哈哈。
兩公婆獨立投資「對沖」
趙：法巴上市衍生產品部前聯席董事 趙海珠（Alison）
Kitty：雖然你由輪后退居幕後做靚媽，但我知你仍然醉心投資。老公係「行外人」，你得閒有無過兩招畀佢？
趙：以前返工太忙，通常只留意大市升跌，離職後反而睇多咗。我比較熟輪證市場，所以老公曾經問過我關於輪證嘅操作，但其實佢本身都讀理科出身，數口精，講到投資分析，佢可能仲叻過我！
彩兒：咁你咪可以將財政大權交晒畀老公，自己專心照顧寶貝仔Hayden囉。
趙：咁又唔係。我哋兩個好獨立，各有各投資，我真係唔知佢買啲咩，又唔會八卦走去問佢，而我買咗咩都唔會話佢知。我哋當年修讀科大工商管理碩士（MBA）課程時認識，加上同月同日出生，所以性格好相似，但投資取態佢比我進取。試過推薦我買某隻細價股，講完「冧巴」都唔知咩公司，但佢夠膽大額買，我就保守啲，只買少少。Double-profit（雙重利潤）就梗係好啦，但如果係Double-loss（雙重損失）咁點算？
Kitty：話唔定你哋兩個一齊研究股票，老公嘅勝算都會加倍呢！
趙：我哋始終唔係喺股場結緣，少啲討論股票，鍾意講樓市多啲。我哋結婚前各自持有一個物業，其中一個喺幾年前成功喺政府推出辣招前沽出，本來仲以為自己好醒，喺高位沽貨，但估唔到樓價呢幾年一直有升無跌。我哋依家諗返轉頭就覺得自己蠢，如果當時有好好運用資金，再投資新物業，目前回報應該都唔錯。
Kitty、彩兒
若有料報畀彩兒同Kitty或有嘢問，可電郵money.biz@opg.com.hk