Market Insight：和電業績有望復甦

港股在消息刺激下，僅得一剎那的光輝，上周四僅升85點，周五經已把升幅化為烏有，收24,679點，全周累積升172點，而兩萬五樓上的阻力進一步被確認。春節前人行再出手的可能性極低下，過年前個市睇怕都相當難捱。

踏入一五年，在多國央行爭先恐後推量寬及減息，加入匯率貶值行列。上周股市表現可見，中國降準對股市的震撼程度經已大不如前，當你睇見周五晚，今年丹麥第四次減息，推存款息率落到負0.75厘（無睇錯，放錢入銀行要畀息），同瑞士睇齊。歐洲的激進，對比中國的慢郎中，可以體會點解基金經理上周四sell on fact毫不手軟。

古勝冇點你

萬里長空

中資股玩家要審慎

事實上，自去年十二月中國滬深兩市成交突破萬億元人仔，超越美國創世界紀錄之後，近兩個月成交金額有級級落的情況。融資桿槓入市的新錢有逐漸衰竭之象。過往經驗，成交金額同股市指數往往不會同步，成交多數走得前一點，在好消息出盡，中央早前打擊券商濫借，令內地股民孖展入市流於審慎，上周五滬綜指跌至3,075點，今年最低位收市，確認展開短期調整。中資股玩家要相當審慎，避開一些之前炒放水升得過多的股份。

中國唔似其他西方國家，專揀周末公布重要經濟數據，或者真係同街外預測經常有太大出入，費事嚇親街坊所以咁做。周日公布的進出口數據，出口跌3.3%，固然同預期上升6.3%差咗幾條街，進口大跌19.9%，比預期的跌3%多六倍幾。數據一來反映春節前的出口唔多掂之外，內需的嚴重不足，令一月貿易順差創600億美元紀錄新高。咁樣落去，要推人民幣貶值有多少難度，但人民幣唔跌，出口更好難在環球貨幣戰之下有得救！

芬佬對李寧失耐性

早兩星期，被基金質到走晒樣的李寧（02331），兩日之間由3.4元水平插到落2.9元水平。股權披露顯示，原來本月二日富達基金出貨，沽122萬股均價3.18元，持股量由6.7%落到5.16%。李寧早排發盈警，預告一四年底虧損不超過8.2億元人民幣，似乎遲遲未見效果的改革，基金股東亦都開始失去耐性。

上周五京信通信（02342）喺食緊晏期間發盈喜，預告全年虧轉盈之外，全年盈利不少於1.4億元。下午一開市，股價一度炒上2.17元，升17.9%，尾段回番些少收2.03元亦升一成收市，炒半日成交有近2.4億元，認真巴閉。睇京信出現盲搶情況，可見個市真係無故事可追，散仔亂咁衝。

睇番舊年上半年京信已賺7,230萬元，以全年盈利不少於1.4億元，意味下半年最少可能賺得6,770萬元，仲差過上半年，亦差過平均大行估計的2.3億元一大截，以31億元市值，22倍PE，電訊設備股中唔算平，唔好單單因為盈喜兩個字就亂咁搶。

長和系再成避風港

人民銀行降準效果被貨幣戰抵銷，炒寬鬆政策的銀行股升浪可能告一段落。同一時間，出口唔掂，內需唔靈，相對四平八穩的電企，又要減電價為經濟作出貢獻，似乎短期無乜邊個板塊會有比較突出的表現，難怪一眾基金經理，無嘢炒寧願信晒超人，等待表決重組方案的長實（00001）及和黃（00013），成為近排市況膠着的避風港，連同長江基建（01038）齊齊愈升愈有。

和電香港（00215）可能是較被忽視的一員，可能同舊年半年業績倒退四成三，即將出來的全年業績難會好睇有關，但其實和電業績已經見底。上半年業績麻麻，主要係期內無一部全城熱搶手機出現，反之舊年下半年蘋果iPhone 6大賣，應該幫到上台及數據消費。

大環境，香港電訊（06823）收購CSL後，香港電訊商五變四，行業整合價格競爭戰大為收斂，反而見高用量的加價潮，本地電訊業營收應可見底回升，再者，以一五年復甦下的業績，估計息率有近4厘，在近期好息之徒橫行下，可以睇高一線。

古勝