絲絲日前講過，證監會副行政總裁兼投資產品部、國際及中國事務執行董事張灼華接班人好快就敲定，候選人中不乏本地城中猛人，並且由中國人出任機會甚大。
尋日，答案終於揭曉。財經事務及庫務局前副局長梁鳳儀將接替張灼華，出任證監會投資產品部執行董事，為期3年，三月二日生效。
市場對於梁鳳儀出掌證監會執行董事一職都唔感到意外，市場早已揣測，城中唔少女強人，包括梁鳳儀在內，都好適合坐呢個位。
梁鳳儀喺○八年至一三年出任財庫局副局長，向來好熟悉人民幣業務，依家佢出掌證監會投資產品部，有唔少投資產品都同人仔業務有關，應該駕輕就熟。
梁鳳儀當年離開政府後，當時市場盛傳佢會過檔金管局，事後證實沒有其事，其實佢係去咗三間政策研究及學術機構擔任顧問工作。「韜光養晦」咗一年多後決定重出江湖，市場期待佢能否為證監會帶來新景象。
睇番張灼華個位，13/14年度年薪總計達680多萬元。不過，張灼華除咗掌管投資產品部，仲係副行政總裁，亦睇埋國際及中國事務。
至於張灼華，將於今個月二十八日退休。市傳佢喺證監會退休後，有可能去教法律，以佢咁多年經驗，傳授畀學生，肯定獲益良多！
余絲韻