絲絲講場：神州租車燒錢鬥「騰雲」
半新股神州租車（00699）呢幾日成為內地專車服務市場嘅「深水炸彈」，向馬化騰同馬雲正式宣戰！
內地汽車限購刺激在前，騰訊（00700）同阿里巴巴已先後注資滴滴打車同快的打車，神州租車亦唔執輸，最近聯合優車科技強勢開拓代駕「神州專車」服務，呢場硬仗究竟鹿死誰手呢？
預25億補貼新客
要做「騰雲」勁敵，神州租車都預咗燒錢，「神州專車」頭炮就推展為期一年嘅「免費首乘」大型體驗活動，每位新客首張單可免50蚊人仔，按公司估算今年吸納到5,000萬新客仔，即隨時補貼25億人仔，仲未計增值100蚊人仔回贈100蚊人仔嘅大贈送優惠喎。不過，斷估神州租車唔會以本傷人，好似話呢啲宣傳費全部由優車科技找數。
擁有五萬幾架車嘅神州租車，車隊實力不用置疑，舊年九月來港上市公開超購逾二百倍，集資三十幾億港紙，尋日又發行埋五億美元優先票據，都算有彈藥開戰。
不過，滴滴、快的已經飲緊頭啖湯，神州租車可以點樣改寫內地專車市場嘅競爭格局，真係要拭目以待。
余絲韻