有三十幾年歷史嘅按摩品牌OTO豪特保健（06880）最近易咗手畀內地物流公司騰邦，原有大股東葉氏兄弟只有葉志禮留低做執董，主責公司營運，而新管理層都已經就位，尋日仲以呢個組合首次亮相。絲絲就好想知佢哋邊個主動追求對方，葉生形容今次大家係一見如故，所以紅娘一牽線，佢哋就一拍即合喇！
葉生仲話，OTO品牌已經三十幾年，原本管理層都做到年紀好大，係時候需要輸入年輕新血，而騰邦員工嘅平均年齡係30出頭，相信合作會為品牌帶嚟新概念。
同樣係80後嘅新CEO黃鏡愷就話，佢哋本身係物流同埋電商專家，而且睇好OTO品牌及保健行業嘅前景咁話，所以嚟緊會做大OTO嘅線上業務，不過詳情就要下回分解喇。
業務方面，葉生透露，佔中過後嘅聖誕節，香港業務表現好好，而農曆新年都嚟緊，佢就好有期望，話目標內地銷售額好過平日兩成咁多！
余絲韻