絲絲講場：滙豐總行獅威倍增
滙豐總行大廈廣場封咗板幾個月，尋日終於「拆禮物」，原來係南面入口放多咗兩隻石獅子同北門打對台，而地下就多咗幅中環歷史街道嘅石刻。絲絲數一數，全個廣場依家夾埋有四隻獅子，剛剛好鎮住四個角落，而南面入口放石獅子，係有聚財作用添！
兩「新」石獅歷史悠久
大家千萬唔好睇小呢兩隻「新」石獅，原來佢哋大有來頭，係老過絲絲嘅阿爺級文物。話說早喺一九三五年，滙豐第三代總行落成嘅時候，呢兩隻石獅已經擺咗喺頂樓俯視香江，直到依家第四代大樓喺一九八一年動工，先拆咗落嚟瞓咗個晏覺。
董事局「晒冷」撐開幕
今次兩大文物重出江湖，滙控（00005）一班董事局成員都好畀面，唔止請到兩大高層，行政總裁歐智華同主席范智廉專程嚟主持開幕禮，大家比較熟悉嘅亞太區行政總裁王冬勝同董事查史美倫都有撐場，成個董事局夾夾埋埋十幾人一次過「晒冷」，真係陣容鼎盛！
咁多位高層都有出嚟撐場，可見香港嘅地位喺集團心目中都有一定分量。行政總裁歐智華致詞時話，滙豐一直以香港為傲，香港嘅成功即係滙豐嘅成功！呢兩隻石獅見證滙豐同香港成長，依家重新請出呢兩位老朋友，係向咁多年嚟為滙豐同香港貢獻過嘅人才致敬咁話。
余絲韻