Market Insight：魚缸暫乏利好因素

在聯儲局擺出一副與全球央行對着幹的貨幣政策姿態，金融市場反應就最老實，隔晚華爾街三大指數尾市倒水一樣咁跌，道指跌近200點收市，乃踏入一五年以來收市新低。美匯指數掉頭回升，聯儲局的聲明無動搖到債商，唔多信聯儲局真係有條件大力加息，十年期美債息急跌0.1厘去到1.72厘，是一三年五月以來最低，而三十年債息更加落到去2.29厘，創下有三十年債以來的歷史新低。

到底係聯儲局得把口抑或債商睇錯？又或聯儲局酌量在七月之後有限度加息，例如加0.25厘或者累積加半厘兌現承諾？

古勝冇點你

萬里長空

聯儲「首加」極為審慎

古勝認為第三個可能性最低，一來利率正常化，唔同人心目中都會有不同定義，有人可能覺得2厘恰當，亦有人會認為0.5厘都已經加到盡，在市場仍停留在揣測何時加息的今日，估加到幾多其實意義唔大。重點反而係一旦聯儲局啟動加息，展開緊縮資金成本周期，絕唔可能加咗一次半次就發現經濟頂唔順，走返轉頭再減息甚至QE，所以「首加」一定相當小心，實行寧遲莫早。

最重要是，單單在過去近半年，美國完成每月的購買資產計劃，市場對加息殺埋身的預期升溫，已經推美金炒到半天高，道指去到萬八點經已拒絕再升，一旦聯儲局落實由寬鬆回到正常貨幣政策，美元及華爾街的震盪只會加大。

目前歐、日經濟情況唔明朗，中國亦然，希臘這個計時炸彈未拆，聯儲局敢唔敢六、七月開始加息，批死佢機會應該細過一半，看官又不妨放長雙眼睇，下次聯儲局議息要去到三月十七、十八日，美股投資者會唔會再一次自己嚇自己，最終要耶倫一如去年，在股市急跌壓力下出嚟放風話未有耐加息，以恢復股市穩定，這點股民反而值得留意。

睇好恒安大行籲買

港股在美股連插兩日下，好友終於托唔到一月期指高位結算，昨日恒指低開216點後，全日反彈乏力，最多跌過337點，埋單跌265點收24,595點，全日近千隻股票向下，跌得全面。

A股腳軟拖累中資銀行及保險股，主要係愈來愈多基金認為，近期人行連續進行逆回購，使短期人行全面降低存款準備金率的機會率降低，中資金融股失去咗炒作故事，使國指跌幅大於恒指，收報11,736點跌227點。睇走勢，恒指及國指今浪大有可能先回試24,313點及11,544點的支持位。

隨着能源及原材料價格向下，大行紛紛從慳皮的角度去尋寶，昨日高盛將恒安國際（01044）放入確信買入名單，認為佢係油價下跌的受惠者，有利未來幾年毛利率繼續改善，而衞生巾產品的高銷售增幅，亦都會推動一四至一六年恒安複合年銷售增長率，維持在13%左右，目標價睇102.5元。恒安股價昨逆市升3.5%，收報88.8元。

查實以往每當內地原材料價格及通脹回落，恒安威威之外，幾隻副食品股毛利率同股價都會水漲船高，不過，今浪罕有唔輪到佢哋，事關大孖沙睇毛利率改善之外，更重視top line（銷售額）可唔可以維持增長，但內地零售增長持續放緩，睇番統一（00220）及旺旺（00151）去年上半年銷售額增長得1.3%及5.6%，康師傅（00322）仲差，九個月倒退4%，估值又唔平得恒安好多，難怪近排股價走勢麻麻。

阿里影業打名人牌

近排外圍消息多多，香港魚缸本身卻悶到慌，但無乜新聞有「小燕子」入股阿里影業（01060）咁夠噱頭，中國最高電影票房女導演暨法國酒莊莊主趙薇，斥資31億元入股9.18%，進身第二大股東。

以咁價錢入股有乜搞作？局外人當然所知唔多，公司被阿里巴巴入股前後，阿里影業資產淨值由10億元泵大到中期的69.9億元，因為去年三月現金認購新股，令公司手頭現金由2億增加至64.9億元，但都係等同每股0.3元左右，但依家個價衝落去買呢間未知將來發展成點的公司，有1.36元係買馬雲同趙薇的名氣。唔知點解，總係覺有如十幾年前科網熱，股民唔理三七二十一衝咗至算的感覺。

古勝