經典科幻電影《回到未來2》嘅預言將會成真，相信唔少戲迷都知。Nike早前已宣布，預計今年推出自動綁帶Nike波鞋，即戲中預設一五年會出現嘅高科技波鞋。不過，內地運動品牌361度（01361）卻不讓國際品牌專美，因佢同百度都合作整咗對智能童鞋，仲兼具定位、無線充電技術，明顯睇中內地寶貝嘅市場。
雖然361度改寫唔到《回到未來2》嘅歷史，但呢款智能童鞋怕且可令市場重新審視一下內地運動品牌。家陣內地市面都有啲雜牌軍賣緊類似產品，但質量、可靠程度只係有限保證。反觀361度夥拍巨頭百度嘅信譽，就較有先天優勢。
361度呢對智能童鞋擁有百度「鷹眼」WiFi定位功能之外，在百度大數據同百度地圖互動情況下，當小朋友離開監察範圍，父母仲可以第一時間收到提醒，加埋監測埋細路身體健康狀況，點到父母唔心郁先。不過，絲絲相信可穿戴設備智能鞋熱潮，好快燒到大人波鞋，到時女朋友們又點可以唔買對看門口！
余絲韻